امریکا سے مذاکرات جاری رکھنے کی درخواست نہیں کی: ایران نے ٹرمپ کا دعویٰ مسترد کر دیا

ایران نے امریکہ سے مذاکرات جاری رکھنے کی درخواست کے امریکی صدر ڈونلڈ ٹرمپ کے دعوے کو قطعی طور پر مسترد کر دیا ہے۔ ایرانی وزارتِ خارجہ کے ترجمان نے صدر ٹرمپ کے بیان کی باقاعدہ تردید کرتے ہوئے واضح کیا کہ تہران نے واشنگٹن سے مذاکرات کی کوئی باضابطہ درخواست نہیں کی، بلکہ انہوں نے صرف قطری ثالثوں کے دورۂ ایران کو قبول کیا تھا۔ برطانوی خبر رساں ایجنسی ‘رائٹرز’ اور ایرانی سرکاری ٹی وی کے مطابق، ترجمان نے امریکہ کو سخت لہجے میں خبردار کیا کہ اگر واشنگٹن نے حالیہ مفاہمتی یادداشت کی کسی بھی شق کی خلاف ورزی کی، تو ایران کی جانب سے بھی باہمی اور متناسب کارروائی کی صورت میں بھرپور جواب دیا جائے گا۔

واضح رہے کہ گزشتہ روز امریکی صدر ڈونلڈ ٹرمپ نے دعویٰ کیا تھا کہ ایران نے ان سے مذاکرات کی درخواست کی ہے جسے انہوں نے قبول کر لیا ہے، تاہم انہوں نے دوٹوک انداز میں یہ بھی کہا تھا کہ ایران کے ساتھ جنگ بندی اب ختم ہو چکی ہے۔ ایران کے اس تازہ ترین بیان نے ٹرمپ کے اس دعوے کو یکسر مسترد کر دیا ہے۔