پاکستان کا حالیہ کشیدگی پر اظہار تشویش، فریقین کو مذاکرات کی میز پر لانے پر زور

اقوامِ متحدہ کی سلامتی کونسل (UNSC) میں ایران کی صورتحال اور خطے کی تازہ ترین صورتحال پر ایک اہم اجلاس ہوا، جس سے پاکستان کے مستقل مندوب عاصم افتخار نے بھی خطاب کیا۔ پاکستانی مندوب نے خطے میں بڑھتی ہوئی حالیہ کشیدگی پر گہری تشویش کا اظہار کرتے ہوئے واضح کیا کہ یہ صورتحال کسی بھی فریق کے مفاد میں نہیں ہے، اس لیے عالمی برادری کو تمام فریقین کو دوبارہ مذاکرات کی میز پر لانے کے لیے ہر ممکن کوشش کرنی چاہیے۔ انہوں نے تمام متعلقہ ممالک پر زور دیا کہ وہ انتہائی صبر و تحمل کا مظاہرہ کریں اور کوئی بھی ایسا یکطرفہ قدم اٹھانے سے گریز کریں جس سے خطے کے امن و استحکام کو ناقابلِ تلافی نقصان پہنچے۔ عاصم افتخار نے مزید کہا کہ ’اسلام آباد مفاہمتی یادداشت‘ (Islamabad MoU) تمام موجودہ مسائل کو پُرامن مذاکرات کے ذریعے حل کرنے کے لیے ایک بہترین اور واضح روڈ میپ فراہم کرتی ہے، جس پر عمل کیا جانا چاہیے۔