ابرار الحق نے گانے ’نچ پنجابن‘ کی تخلیق کی دلچسپ کہانی سنا دی

معروف پاکستانی گلوکار ابرار الحق نے اپنے مقبول ترین اور سدا بہار گانے ’نچ پنجابن‘ کی تخلیق کے پیچھے چھپی ایک دلچسپ کہانی سے پردہ اٹھایا ہے، اور بتایا ہے کہ اس گانے کا مشہورِ زمانہ جملہ “گانے نوں دے دے پنجابی ٹچ” کس طرح وجود میں آیا۔

ایک یوٹیوب چینل کو دیے گئے حالیہ انٹرویو میں ابرار الحق نے ماضی کی یادیں تازہ کرتے ہوئے بتایا کہ جب وہ اس گانے کے ابتدائی بول لکھ رہے تھے، تو اس میں “میری سائیکل ہولی چل دی سی، میں گاڈی فل پگھاواں گا، سائیکل تے بندے دو بندے، میں پوری قوم بٹھا منگاں” جیسے جملے شامل تھے۔ اسی دوران انہوں نے اپنے کزن ٹیپو سے گانے کے حوالے سے ان کی رائے مانگی۔

گلوکار کے مطابق انہوں نے پوچھا، “ٹیپو! کیسا لگ رہا ہے؟” جس پر ان کے کزن نے جواب دیا کہ گانا تو اچھا ہے، لیکن اس میں وہ روایتی ‘پنجابی ٹچ’ محسوس نہیں ہو رہا۔ ابرار الحق نے بتایا کہ کزن کی یہی بات ان کے ذہن میں گھر کر گئی اور انہوں نے گانے پر مزید کام کرتے ہوئے اچانک یہ لازوال مصرع تخلیق کر ڈالا:

“تھوڑا جیا گانے نوں دے دے پنجابی ٹچ، تھوڑا جیا میوزک نوں دے دے پنجابی ٹچ۔”

انہوں نے کہا کہ یہی وہ موڑ تھا جس نے اس گانے کو ایک بالکل نئی پہچان دی اور ’نچ پنجابن‘ اپنے اسی منفرد انداز میں مکمل ہو کر سامنے آیا۔

واضح رہے کہ ابرار الحق نے 1995ء میں اپنے پہلے البم ’بِلو دے گھر‘ سے شہرت کی بلندیوں کو چھوا تھا، جس کی دنیا بھر میں 1 کروڑ 60 لاکھ سے زائد کاپیاں فروخت ہوئیں۔ اس تاریخی کامیابی کے بعد انہیں پاکستان میں پاپ اور بھنگڑا موسیقی کا بے تاج بادشاہ تسلیم کیا جانے لگا۔ بعد ازاں ان کے کئی دیگر گانے بھی سپر ہٹ ہوئے جنہوں نے پاکستانی بھنگڑا میوزک کو دنیا بھر میں ایک نئی شناخت دی۔

دلچسپ بات یہ ہے کہ 2000ء کی دہائی کے آغاز میں اس گانے کو کچھ حلقوں کی جانب سے تنقید کا سامنا بھی کرنا پڑا تھا، جہاں لفظ ‘پنجابن’ کے استعمال پر اعتراض اٹھایا گیا۔ تاہم، ابرار الحق نے فراخدلی کا مظاہرہ کرتے ہوئے اس گانے کو نئے انداز میں ریکارڈ کیا اور اس کا نام بدل کر ’نچ مجاجن‘ رکھ دیا تھا، جسے مداحوں نے پھر بھی بے حد پسند کیا۔