ابرار الحق نے گانے ’نچ پنجابن‘ کی تخلیق کی دلچسپ کہانی سنا دی

معروف پاکستانی گلوکار ابرار الحق نے اپنے مقبول ترین اور شہرہ آفاق گانے ‘نچ پنجابن’ کی تخلیق کے پیچھے چھپی دلچسپ کہانی سے پردہ اٹھاتے ہوئے بتایا ہے کہ اس کا مشہورِ زمانہ جملہ “گانے نوں دے دے پنجابی ٹچ” کس طرح وجود میں آیا۔ ایک یوٹیوب چینل کو دیے گئے انٹرویو میں انہوں نے انکشاف کیا کہ جب وہ گانے کے ابتدائی بول لکھ رہے تھے، تو انہوں نے اپنے کزن ٹیپو سے اس پر رائے مانگی۔ کزن نے تبصرہ کیا کہ گانا اچھا ہے لیکن اس میں “پنجابی ٹچ” محسوس نہیں ہو رہا، جس پر یہ جملہ ان کے ذہن میں بیٹھ گیا اور انہوں نے فوری طور پر اسے گانے کا حصہ بنا دیا، جس نے بعد میں اس گانے کو ایک نئی پہچان دی۔ واضح رہے کہ 1995 میں اپنے پہلے البم ‘بلو دے گھر’ سے شہرت کی بلندیوں پر پہنچنے والے ابرار الحق کو 2000ء کی دہائی کے آغاز میں ‘نچ پنجابن’ پر بعض حلقوں کی جانب سے تنقید کا سامنا بھی کرنا پڑا تھا، جہاں لفظ ‘پنجابن’ کے استعمال پر اعتراض اٹھایا گیا، جس کے بعد انہوں نے اس گانے کو نئے انداز میں ‘نچ مجاجن’ کے نام سے دوبارہ ریکارڈ کیا۔