اسرائیل کے طبی امداد تک رسائی میں رکاوٹ ڈالنے پر 4 ماہ کا فلسطینی بچہ شہید

مقبوضہ مغربی کنارے میں اسرائیلی فوج کی جانب سے طبی امداد تک رسائی میں رکاوٹ ڈالنے کے باعث ایک اور افسوسناک سانحہ سامنے آیا ہے، جہاں محض چار ماہ کا بیمار فلسطینی شیرخوار بچہ بروقت ہسپتال نہ پہنچنے کے کارن دم توڑ گیا۔

مقامی حکام نے بتایا کہ یہ دردناک واقعہ رملہ کے مغرب میں واقع گاؤں ‘دیر عمار’ کے داخلی راستے پر قائم اسرائیلی فوجی چوکی پر پیش آیا۔ اسرائیلی فوجیوں نے شدید علالت کا شکار بچے کو فوری طبی امداد کے لیے ہسپتال منتقل کرنے والی گاڑی کو روک لیا اور اسے آگے جانے کی اجازت نہیں دی۔اسرائیلی فوجیوں نے علاقے کے مکینوں اور وہاں سے گزرنے والی دیگر گاڑیوں پر اندھا دھند آنسو گیس کے شیل بھی فائر کیے۔ آنسو گیس کے شدید اثرات اور فوجی چوکی پر ہونے والی غیر ضروری تاخیر کے نتیجے میں معصوم بچے کی حالت مزید بگڑ گئی اور وہ بروقت ہسپتال منتقل نہ کیے جانے کے باعث جاں بحق ہو گیا۔

مقامی اور بین الاقوامی انسانی حقوق کی تنظیموں کے مطابق یہ واقعہ کوئی پہلا اتفاق نہیں ہے بلکہ یہ باقاعدہ اسرائیلی پالیسی کا حصہ ہے۔ مقبوضہ علاقوں میں جابجا قائم فوجی چوکیوں، لوہے کے گیٹوں اور سخت ترین پابندیوں کے ذریعے عام شہریوں، شدید بیمار مریضوں اور یہاں تک کہ ایمبولینسوں کی نقل و حرکت میں بھی شدید رکاوٹیں کھڑی کی جاتی ہیں، جو کہ بنیادی انسانی اور طبی حقوق کی کھلی خلاف ورزی ہے