بھارتی وزیراعظم مودی کا ایرانی سپریم لیڈر کی آخری رسومات میں جانے سے انکار، دوغلی پالیسی عیاں

ایران کے شہید سپریم لیڈر آیت اللہ سید علی خامنہ ای کی آخری رسومات میں بھارتی وزیراعظم نریندر مودی کی عدم شرکت کے فیصلے نے بھارت کے اندرونی سیاسی حلقوں اور عالمی سفارتی محاذ پر ایک نئی اور گرم لکیر کھینچ دی ہے۔ سیاسی تجزیہ کاروں اور دفاعی ماہرین کی جانب سے مودی حکومت کی اس پالیسی کو “کھوکھلی اور دوغلی سفارتکاری” قرار دے کر شدید تنقید کا نشانہ بنایا جا رہا ہے۔

بھارتی جریدے ‘ٹائمز آف انڈیا’ کے مطابق، ایرانی صدر مسعود پزشکیان کی جانب سے ذاتی طور پر باضابطہ دعوت نامہ بھیجے جانے کے باوجود وزیراعظم نریندر مودی نے تہران جانے سے صاف انکار کر دیا۔ بھارت نے اس تاریخی و عظیم الشان جنازے میں شرکت کے لیے ایک انتہائی جونیئر سطح کا وفد تہران بھیجا ہے، جس کی قیادت وزیرِ مملکت برائے خارجہ پبیترا مارگریٹا اور ریاست بہار کے گورنر لیفٹیننٹ جنرل (ر) سید عطا حسنین کر رہے ہیں۔

وزیراعظم مودی کے اس فیصلے پر بھارت کے اپنے دفاعی اور سیاسی مبصرین برہم دکھائی دے رہے ہیں۔ بھارتی تجزیہ کار پروین شانے کا کہنا ہے کہ مودی نے امریکہ اور اسرائیل کو ناراضگی سے بچانے کے لیے ایران جانے سے گریز کیا، جو کہ آزاد خارجہ پالیسی کی نفی ہے۔

دوسری جانب، معروف بھارتی دفاعی تجزیہ کار میجر جنرل (ر) جے ڈی بخشی نے اس فیصلے کو آڑے ہاتھوں لیتے ہوئے یاد دلایا کہ ماضی میں جب سابق بھارتی وزیراعظم اندرا گاندھی کا انتقال ہوا تھا، تو ان کی آخری رسومات میں ایرانی سپریم لیڈر نے خود شرکت کی تھی۔ انہوں نے کہا کہ اخلاقی اور سفارتی طور پر نریندر مودی کو ایران جانا چاہیے تھا، اور اتنے بڑے موقع پر صرف ایک جونیئر وزیر اور صوبائی گورنر کو بھیجنا مودی حکومت کی غیر سنجیدہ ترجیحات کو ظاہر کرتا ہے۔

رپورٹس کے مطابق، بھارتی وفد کے برعکس پاکستان نے اس موقع پر انتہائی اعلیٰ سطح کا وفد تہران بھیجا ہے۔ پاکستان کی نمائندگی خود وزیراعظم شہباز شریف اور ملک کے اعلیٰ ترین حکام کر رہے ہیں، جو پاک-ایران گہرے، تاریخی اور برادرانہ تعلقات کا منہ بولتا ثبوت ہے۔

ماہرینِ خارجہ امور کا کہنا ہے کہ مودی حکومت کا یہ رویہ خود غرضی پر مبنی ہے۔ ایک طرف بھارت کو اپنی معیشت کے لیے ایران سے سستا تیل چاہیے، چابہار پورٹ کے ذریعے وسطی ایشیا تک تجارتی رسائی درکار ہے اور آبنائے ہرمز جیسے اہم آبی راستے پر ایرانی تعاون کی ضرورت ہے، لیکن جب دکھ کی اس گھڑی میں ایران کے ساتھ کھڑے ہونے کا وقت آیا تو مودی نے اسرائیل اور امریکی خوف کی وجہ سے پیٹھ دکھا دی، جس سے نئی دہلی اور تہران کے تعلقات پر منفی اثرات پڑ سکتے ہیں۔