امریکا اور ایران کے درمیان ثالثی پاکستان کے لیے بڑا اعزاز ہے، فیلڈ مارشل عاصم منیر نے دن رات محنت کر کے اہم کردار ادا کیا: وزیراعظم شہباز شریف

وزیراعظم شہباز شریف نے ترک ٹی وی چینل ‘ٹی آر ٹی ورلڈ’ کو انٹرویو دیتے ہوئے کہا ہے کہ امریکا اور ایران کے درمیان ثالثی کا کردار ادا کرنا پاکستان کے لیے ایک بڑا اعزاز تھا۔ انہوں نے اس عزم کا اظہار کیا کہ یہ ایک نہایت اہم لیکن انتہائی مشکل اور پیچیدہ ذمہ داری تھی، جسے پاکستان نے ایک ہمسایہ ملک ہونے کے ناطے مکمل دیانتداری، خلوص اور احتیاط کے ساتھ نبھایا۔

وزیراعظم شہباز شریف نے مذاکراتی عمل کی کامیابی کا بڑا کریڈٹ دیتے ہوئے بتایا کہ فیلڈ مارشل سید عاصم منیر نے اس پورے عمل میں انتہائی اہم اور کلیدی کردار ادا کیا۔ فیلڈ مارشل ایرانی اور امریکی قیادت کے ساتھ مسلسل رابطے میں رہے اور انہوں نے دن رات محنت کر کے اس معاملے کو آگے بڑھایا۔

وزیراعظم کا کہنا تھا کہ ایران اور امریکا کے درمیان مذاکرات اس وقت بھی جاری ہیں اور تمام تر مشکلات کے باوجود اب تک معاملات انتہائی بہتر انداز میں آگے بڑھے ہیں۔ انہوں نے ترکیہ، سعودی عرب، قطر اور دیگر دوست ممالک کے کردار کو بھی دل کھول کر سراہا اور کہا کہ دوست ممالک کی بھرپور حمایت کے بغیر ایران امریکا ڈیل کا ممکن ہونا ناممکن تھا۔

وزیراعظم شہباز شریف نے امید ظاہر کی کہ آئندہ دو ماہ کے دوران خطے میں پائیدار امن قائم ہو جائے گا۔ ترک صدر کے حوالے سے بات کرتے ہوئے انہوں نے کہا کہ رجب طیب اردوان غزہ، فلسطین اور کشمیر سمیت دنیا کے مختلف تنازعات میں ہمیشہ امن کے مضبوط حامی رہے ہیں۔