نواز شریف ایگرکلچر یونیورسٹی میں مینگو اینڈ ڈیٹس فیسٹیول، ہائی کمشنر بنگلادیش کی شرکت

محمد نواز شریف یونیورسٹی آف ایگریکلچر ملتان (MNSUA) میں آم اور کھجور کی پیداوار اور زرعی صلاحیتوں کو اجاگر کرنے کے لیے ‘مینگو اینڈ ڈیٹس فیسٹیول’ کا شاندار آغاز ہو گیا ہے۔ فیسٹیول کے افتتاحی روز بنگلادیش کے ہائی کمشنر محمد اقبال حسین خان نے بطور مہمانِ خصوصی شرکت کی۔

بنگلا دیش ہائی کمیشن کی جانب سے جاری کردہ اعلامیے کے مطابق، ہائی کمشنر محمد اقبال حسین خان کے ہمراہ ڈپٹی ہائی کمشنر فضل لوہانی بابو، پریس کونسلر محمد طیّب علی اور سفارت خانے کے دیگر اعلیٰ حکام بھی اس موقع پر موجود تھے۔

ملتان میں سجا یہ روایتی اور رنگا رنگ مینگو اینڈ ڈیٹس فیسٹیول 5 جولائی تک جاری رہے گا۔ اس میلے کا بنیادی مقصد جنوبی پنجاب کی خاص پہچان، آم اور کھجور کی بہترین پیداوار، پاکستان کی زرعی صلاحیتوں اور ملکی معیشت میں زرعی شعبے کی کلیدی اہمیت کو بین الاقوامی سطح پر اجاگر کرنا ہے۔

اس اہم فیسٹیول میں نہ صرف ملکی و غیر ملکی سفارتی شخصیات اور اعلیٰ حکام شریک ہو رہے ہیں بلکہ زرعی ماہرین، کاشتکاروں اور مختلف شعبہ ہائے زندگی سے تعلق رکھنے والے افراد کی ایک بڑی تعداد بھی آم اور کھجور کی مختلف اقسام اور ان کی پروسیسنگ کے جدید طریقوں کا جائزہ لینے کے لیے یونیورسٹی کا رخ کر رہی ہے۔