سپریم لیڈر کی آخری رسومات کے باعث ایران مذاکرات میں ایک ہفتے کا وقفہ کیا ہے، ٹرمپ

امریکی صدر ڈونلڈ ٹرمپ نے ساؤتھ ڈکوٹا میں واقع تاریخی مقام ‘ماؤنٹ رشمور’ پر امریکہ کی آزادی کے 250 سال مکمل ہونے کی یادگار تقریبات سے خطاب کرتے ہوئے امریکی تاریخ، عالمی کردار اور عسکری طاقت کو بھرپور انداز میں سراہا ہے۔ انہوں نے اپنے خطاب میں دعویٰ کیا کہ امریکہ نے دنیا کی سب سے طاقتور فوج تشکیل دی اور دو عالمی جنگیں جیتیں۔

اپنے مخصوص انداز میں امریکی جغرافیے اور معیشت کو خراجِ تحسین پیش کرتے ہوئے انہوں نے نیاگرا فالز کے گرجتے پانیوں سے لے کر ٹیکساس کے تیل کے کنوؤں، مڈویسٹ میں مکئی و گندم کے کھیتوں اور نیویارک کے مالیاتی مراکز (وال اسٹریٹ) کا ذکر کرتے ہوئے امریکی عظمت کو اجاگر کیا۔ ٹرمپ نے کہا کہ امریکہ دنیا کی سب سے پرانی جمہوریہ اور سب سے آزاد قوم ہے، جبکہ امریکی آئین دنیا کا سب سے مضبوط ترین دستاویز ہے۔

بین الاقوامی سفارت کاری اور مشرقِ وسطیٰ کی صورتحال پر بات کرتے ہوئے صدر ڈونلڈ ٹرمپ نے دعویٰ کیا کہ حالیہ شدید کشیدگی کے باوجود تہران (ایران) امریکہ کے ساتھ معاہدہ کرنے کے لیے شدید بے تاب ہے۔ انہوں نے ایک اہم انکشاف کرتے ہوئے کہا کہ امریکہ نے ایران کو (ریاستی) جنازے کے باعث ایک ہفتے کی خصوصی مہلت دی تھی۔

ڈونلڈ ٹرمپ نے اپنے خطاب میں فخر کا اظہار کرتے ہوئے کہا کہ امریکی عوام نے دنیا بھر میں سب سے زیادہ فلاحی کام کیے ہیں اور عالمی سطح پر بھوک کے خاتمے اور مہلک بیماریوں کے علاج میں ہمیشہ نمایاں ترین کردار ادا کیا ہے۔

داخلی سیاست اور نظریاتی جنگ پر بات کرتے ہوئے صدر ٹرمپ نے خبردار کیا کہ اس وقت امریکہ کے اندر کمیونزم کا خطرہ دوبارہ سر اٹھا رہا ہے، جسے انہوں نے امریکی آزادی اور بقا کے لیے ایک بڑا اور سنگین خطرہ قرار دیا۔ انہوں نے واشگاف الفاظ میں عزم ظاہر کیا کہ “امریکہ کبھی بھی ایک کمیونسٹ ریاست نہیں بنے گا”۔ اس کے ساتھ ہی انہوں نے آئندہ آنے والے انتخابات کے حوالے سے بھی اپنی جماعت (ریپبلکن پارٹی) کی حتمی کامیابی کا پختہ عزم ظاہر کیا۔