غیر رجسٹرڈ تعلیمی اداروں پر 40 لاکھ روپے تک جرمانہ کیا جا سکتا ہے، وزیر تعلیم پنجاب

باغبان پورہ میں اسکول کے افسوسناک حادثے کے بعد حکومتِ پنجاب نے صوبے بھر میں غیر رجسٹرڈ نجی اسکولوں اور اکیڈمیز کے خلاف بڑے پیمانے پر سخت قانونی کارروائی کا آغاز کر دیا ہے۔ صوبائی وزیرِ تعلیم رانا سکندر حیات نے واقعے کی رپورٹ طلب کرتے ہوئے تحقیقات کا حکم دے دیا ہے۔ انہوں نے واضح کیا کہ “معصوم بچوں کی ہلاکت ایک ناقابلِ تلافی نقصان ہے” اور حکومت تعلیمی اداروں میں حفاظتی معیار پر کسی قسم کا کوئی سمجھوتہ نہیں کرے گی۔

وزیرِ تعلیم پنجاب رانا سکندر حیات کا کہنا ہے کہ صوبے میں ہر نجی تعلیمی ادارے کے لیے رجسٹریشن لازمی ہے اور رجسٹریشن کے بغیر اسکول یا اکیڈمی چلانا اب قانوناً سنگین جرم تصور ہوگا۔ انہوں نے خبردار کیا کہ نئے قانون کے مطابق غیر رجسٹرڈ تعلیمی ادارے چلانے والوں پر 3 لاکھ روپے سے لے کر 40 لاکھ روپے تک کا بھاری جرمانہ عائد کیا جا سکتا ہے۔

صوبائی حکومت کے احکامات پر عمل درآمد کرتے ہوئے ڈسٹرکٹ ایجوکیشن اتھارٹی لاہور نے ایک ہی روز میں 744 غیر رجسٹرڈ تعلیمی اداروں کو باضابطہ نوٹسز جاری کر دیے ہیں۔ حکام کے مطابق ان نوٹسز میں اسکولوں اور اکیڈمی مالکان کو سخت ہدایت کی گئی ہے کہ وہ تین روز کے اندر اپنی رجسٹریشن کا عمل ہر صورت مکمل کرائیں، بصورتِ دیگر ان کے خلاف پنجاب کے متعلقہ قوانین کے تحت سخت کارروائی عمل میں لائی جائے گی۔

رانا سکندر حیات نے واضح کیا کہ حکومت کا مقصد نجی تعلیمی اداروں کو بند کرنا یا ان کے روزگار کو نقصان پہنچانا نہیں ہے، بلکہ انہیں قانونی دائرہ کار میں لا کر طلبہ کو ایک محفوظ، پرامن اور معیاری تعلیمی ماحول فراہم کرنا ہے۔ انہوں نے تمام غیر رجسٹرڈ اسکولوں اور اکیڈمی مالکان کو ہدایت کی کہ وہ کسی بھی قسم کی قانونی پیچیدگی یا بھاری جرمانے سے بچنے کے لیے فوری طور پر رجسٹریشن کی درخواستیں جمع کرائیں۔

وزیرِ تعلیم نے مزید اعلان کیا کہ بچوں کے تحفظ کو یقینی بنانے کے لیے اب تمام نجی اسکولوں کے لیے بلڈنگ فٹنس سرٹیفکیٹ حاصل کرنا بھی لازمی قرار دے دیا گیا ہے تاکہ مستقبل میں باغبان پورہ جیسے کسی بھی ناخوشگوار حادثے سے بچا جا سکے۔ محکمہ اسکول ایجوکیشن کے مطابق اس مہم کا بنیادی مقصد صوبے بھر میں نجی تعلیمی اداروں کا مکمل ریکارڈ مرتب کرنا اور حفاظتی تقاضوں پر سختی سے عمل درآمد کرانا ہے۔ مقررہ مدت گزرنے کے بعد قانون شکنی کرنے والے اداروں کو سیل کرنے اور جرمانوں سمیت مزید سخت اقدامات کیے جائیں گے۔