پٹرول کی قیمت میں معمولی کمی شرمناک اور عوام دشمن ہے، اگلے 48 گھنٹوں میں ملک گیر مظاہروں کا اعلان کریں گے: حافظ نعیم الرحمن

لاہور: امیرِ جماعت اسلامی پاکستان حافظ نعیم الرحمن نے حکومت کی جانب سے پیٹرولیم مصنوعات کی قیمتوں میں محض 1 روپے 97 پیسے کی معمولی کمی کے فیصلے کو شدید تنقید کا نشانہ بناتے ہوئے اسے افسوسناک، شرمناک اور عوام دشمن قرار دے دیا ہے۔

اپنے ایک سخت ردعمل میں امیرِ جماعت اسلامی کا کہنا تھا کہ عالمی مارکیٹ میں تیل کی قیمتیں جنگ سے پہلے کی سطح پر آ چکی ہیں، لہٰذا پاکستان میں بھی قیمتیں اسی تناسب سے مقرر کی جائیں۔ انہوں نے الزام عائد کیا کہ حکومت پیٹرول اور ڈیزل کی قیمتوں میں بڑی کمی نہ کرکے براہِ راست عوام کے حق پر ڈاکہ مار رہی ہے، اور یہ سب حکمرانوں کی نااہلی اور عیاشیوں کا نتیجہ ہے۔

حافظ نعیم الرحمن نے وفاق کے ٹیکس نظام پر وار کرتے ہوئے کہا کہ فیڈرل بورڈ آف ریونیو (FBR) کرپشن کا اڈہ بن چکا ہے۔ انہوں نے پیٹرولیم مصنوعات پر عائد لیوی کو سخت تنقید کا نشانہ بناتے ہوئے کہا کہ ‘لیوی’ کے نام پر غریب اور مڈل کلاس عوام سے زبردستی “بھتہ ٹیکس” وصول کیا جا رہا ہے، جسے اب کسی صورت برداشت نہیں کیا جائے گا۔

امیرِ جماعت اسلامی نے عوام کو اپنے حقوق کے لیے سڑکوں پر آنے کی اپیل کرتے ہوئے اعلان کیا کہ جماعت اسلامی اگلے 48 گھنٹوں کے اندر اس ناانصافی کے خلاف ملک گیر احتجاجی مظاہروں کا حتمی اعلان کرے گی۔ ان کا کہنا تھا کہ اب حکمرانوں کا یہ ظلم مزید نہیں چلنے دیا جائے گا۔