صدر آصف علی زرداری کی امریکی صدر ڈونلڈ ٹرمپ کو یومِ آزادی پر مبارکباد؛ پاکستان کے دورے کی دعوت، سفارتی و دفاعی شراکت داری کو مزید وسعت دینے پر زو

صدرِ مملکت آصف علی زرداری نے امریکہ کے صدر ڈونلڈ ٹرمپ اور امریکی عوام کو امریکہ کی آزادی کے 250 سال مکمل ہونے کے تاریخی اور یادگار موقع پر دلی مبارکباد پیش کی ہے۔

امریکی صدر کے نام لکھے گئے اپنے ایک تہنیتی خط میں صدر آصف علی زرداری نے کہا کہ امریکہ اپنی طاقت، جدت، آزادی، جمہوریت اور مساوی مواقع جیسے بنیادی اقدار سے وابستگی کی مضبوط روایت کو مسلسل آگے بڑھا رہا ہے۔ گزشتہ ڈھائی صدیوں کے دوران امریکی عوام کے نمایاں کارناموں نے دنیا کی ترقی اور خوشحالی میں اہم کردار ادا کیا ہے۔

صدر زرداری نے خط میں اس بات پر زور دیا کہ پاکستان اور امریکہ کے درمیان دیرینہ تعلقات باہمی احترام، مشترکہ مفادات، اور امن، سلامتی و خوشحالی کے فروغ کے مشترکہ عزم پر استوار ہیں۔ انہوں نے امریکہ میں آباد متحرک پاکستانی برادری کی خدمات کو سراہتے ہوئے کہا کہ اس کمیونٹی کی کامیابیاں دونوں ممالک کے لیے باعثِ فخر ہیں اور یہ دونوں اقوام کے درمیان دوستی، باہمی اعتماد اور بہتر روابط کا مضبوط ذریعہ ہیں۔

صدرِ پاکستان نے پاک-امریکہ تعلقات کی مثبت سمت پر اطمینان کا اظہار کرتے ہوئے توانائی کی قابلِ اعتماد فراہمی، تجارت و سرمایہ کاری، دفاع اور انسدادِ دہشت گردی سمیت دیگر اہم شعبوں میں قریبی اور منظم تعاون جاری رکھنے کی اہمیت پر زور دیا۔ انہوں نے خطے میں امن و سلامتی کے لیے مضبوط پاک-امریکہ شراکت داری کو ناگزیر قرار دیا اور گزشتہ سال مئی میں دو ایٹمی ہتھیاروں سے لیس ریاستوں کے درمیان جنگ بندی کے لیے صدر ٹرمپ کی کامیاب ثالثی کا خصوصی ذکر کیا۔

صدرِ مملکت نے ایران کے ساتھ مذاکرات کے لیے پاکستان کے ثالثی کے کردار پر امریکی اعتماد کا شکریہ ادا کیا اور واضح کیا کہ خطے کا پائیدار حل صرف مذاکرات، سفارت کاری اور کشیدگی میں کمی کے ذریعے ہی ممکن ہے۔ خط کے آخر میں صدر آصف علی زرداری نے، پاکستانی عوام کی جانب سے، صدر ڈونلڈ ٹرمپ کو پاکستان کا دورہ کرنے کی پُر تپاک دعوت بھی دی۔