امریکی ثالثی میں ہونیوالے معاہدے سے لبنانی علاقے اسرائیل میں ضم ہونےکاخدشہ ہے، حزب اللہ نےلبنان اسرائیل معاہدہ مسترد کر دیا

حزب اللہ نے امریکی ثالثی میں لبنان اور اسرائیل کے درمیان طے پانے والے سہ فریقی فریم ورک معاہدے کو ملکی خودمختاری کے خلاف قرار دیتے ہوئے مکمل طور پر مسترد کر دیا ہے۔ اس معاہدے کے سامنے آتے ہی بیروت سمیت لبنان کے متعدد شہروں میں شدید احتجاج اور فسادات پھوٹ پڑے ہیں.

حزب اللہ کے سیکرٹری جنرل شیخ نعیم قاسم نے اپنے ایک سخت بیان میں کہا کہ امریکی ثالثی میں طے پانے والا یہ فریم ورک معاہدہ لبنان پر اسرائیلی قبضے کو قانونی جواز فراہم کرنے کی ایک سازش ہے۔ انہوں نے خبردار کیا کہ اس معاہدے کے نتیجے میں لبنانی علاقوں کو اسرائیل میں ضم کرنے کی راہ ہموار کی جا رہی ہے۔ شیخ نعیم قاسم نے واضح کیا کہ لبنان سے اسرائیلی فوج کے انخلا کو مزاحمتی گروپوں کو غیر مسلح کرنے سے مشروط کرنا ایک انتہائی خطرناک قدم ہے، جو لبنانیوں کے لیے اپنی ملکی خودمختاری سے دستبردار ہونے کے مترادف ہے۔ ان کا کہنا تھا کہ امریکا اور ایران کے درمیان ہونے والی حالیہ مفاہمتی یادداشت کے بعد اس سہ فریقی فریم ورک معاہدے کی اب کوئی قانونی یا اخلاقی حیثیت نہیں رہی۔ اس نئے معاہدے کے بجائے ایران اور امریکا کے درمیان ہونے والی ڈیل کے تحت طے پانے والے امور پر عمل درآمد ہونا چاہیے۔ سیکرٹری جنرل حزب اللہ نے عزم دہرایا کہ ہم نے مشکل ترین حالات میں بھی میدان نہیں چھوڑا اور نہ اب چھوڑیں گے۔ حزب اللہ، لبنان کی سرزمین سے اسرائیلی فوج کے مکمل انخلا تک اپنی مسلح مزاحمت جاری رکھے گی۔ یاد رہے کہ گزشتہ روز امریکی وزیر خارجہ مارکو روبیو کی موجودگی میں اس تاریخی مگر متنازع معاہدے پر دستخط کیے گئے تھے۔ معاہدے کے تحت اسرائیل اپنے شہریوں کو درپیش سیکیورٹی خطرات کے خاتمے تک اپنی فوج لبنانی حدود میں برقرار رکھ سکے گا۔ لبنان اور اسرائیل نے حزب اللہ کو غیر مسلح کرنے اور اس کے بنیادی فوجی ڈھانچے (انفراسٹرکچر) کو مکمل طور پر ختم کرنے پر اتفاق کیا ہے۔ اس معاہدے کے اعلانات کے ساتھ ہی لبنانی عوام کا غصہ سڑکوں پر آ گیا ہے اور ملک کی سیاسی و سیکیورٹی صورتحال شدید کشیدگی کا شکار ہو گئی ہے۔