طوفان دتوا سری لنکا میں تباہی کے بعد بھارت کی جانب بڑھنے لگا

سری لنکا میں تباہی مچانے کے بعد سمندری طوفان دتوا بھارت کی طرف بڑھ رہا ہے۔ بھارتی میڈیا کے مطابق طوفان آج تامل ناڈو کے ساحلی علاقوں سے ٹکرانے کا امکان ہے۔

طوفان کے پیش خیمے کے طور پر تامل ناڈو میں شدید بارشوں نے نشیبی علاقوں کو زیرِ آب کر دیا جبکہ 50 سے زائد پروازیں منسوخ کر دی گئیں۔ حکام نے ساحلی آبادی کو احتیاطی اقدامات کی ہدایت بھی جاری کر دی ہے۔

اس سے قبل سری لنکا میں طوفان دتوا نے شدید تباہی مچائی، جہاں ہنگامی حالت نافذ کر دی گئی۔ بارشوں، سیلاب اور لینڈ سلائیڈنگ کے نتیجے میں 153 افراد جان کی بازی ہار گئے۔ حکام کے مطابق زیادہ تر اموات لینڈ سلائیڈنگ کے باعث ہوئیں، جہاں شمالی و مشرقی علاقوں میں 300 ملی میٹر تک بارش ریکارڈ کی گئی۔

ماہرین کا کہنا ہے کہ طوفان کی شدت برقرار ہے اور بھارت کے ساحلی علاقوں کیلئے اگلے چند گھنٹے نہایت اہم ہوں گے۔