میرب علی سرجری کے بعد گھر منتقل، مداحوں سے دعاؤں کی اپیل

کراچی: پاکستانی شوبز انڈسٹری کی معروف اور خوبرو اداکارہ و ماڈل میرب علی کی کراچی کے نجی ہسپتال میں انگلی کی پیچیدہ سرجری کامیابی سے مکمل ہو گئی ہے، جس کے بعد انہیں ہسپتال سے گھر منتقل کر دیا گیا ہے۔

اداکارہ میرب علی نے سوشل میڈیا پلیٹ فارم پر مداحوں کو اپنی اچانک بگڑنے والی طبی صورتحال اور آپریشن سے متعلق آگاہ کرتے ہوئے دعاؤں کی اپیل کی ہے۔ انہوں نے بتایا کہ انگلی میں شدید تکلیف اور حرکت میں دشواری کے باعث انہیں سرجری کا متبادل اپنانا پڑا، جس کے بعد وہ کچھ دن ہسپتال میں زیرِ علاج رہیں۔

اداکارہ نے اپنی بیماری کی تفصیلات شیئر کرتے ہوئے بتایا کہ ان کی ایک انگلی میں حرکت محدود ہو گئی تھی اور وہ کام کے دوران بار بار خودبخود ‘لاک’ (جام) ہو جاتی تھی، جس کے باعث انہیں روزمرہ کے عام امور انجام دینے میں شدید مشکلات کا سامنا کرنا پڑ رہا تھا۔

اس مسئلے کے حل کے لیے انہوں نے مختلف ڈاکٹرز سے رجوع کیا شروعات میں ماہر امراضِ جوڑ (رہیومیٹولوجسٹ) اور نیورولوجسٹ نے تفصیلی معائنے کے بعد انہیں بالکل صحت مند قرار دے دیا تھا اور مرض کی تشخیص نہیں ہو سکی تھی۔ بعد ازاں، ایک آرتھوپیڈک سرجن (ہڈیوں کے ماہر) نے ان کا مکمل اور باریک بینی سے معائنہ کیا اور اس تکلیف سے نجات کے لیے فوری سرجری تجویز کی۔

میرب علی کے مطابق، وہ اس آپریشن کو ایک معمولی اور مختصر نوعیت کی سرجری سمجھ رہی تھیں، لیکن جب آپریشن شروع ہوا تو وہ ان کی توقع سے کہیں زیادہ پیچیدہ اور وقت طلب ثابت ہوا۔ یہ اہم آپریشن کراچی کے معروف آغا خان یونیورسٹی ہسپتال میں سرانجام دیا گیا، جہاں انہوں نے علاج کے دوران بیڈ سے اپنی ایک ویڈیو بھی ریکارڈ کر کے مداحوں کے ساتھ شیئر کی۔

اداکارہ کا کہنا ہے کہ سرجری کے بعد اب وہ بتدریج صحت یاب ہو رہی ہیں اور ڈاکٹرز نے انہیں مکمل آرام کا مشورہ دیا ہے۔

اداکارہ کی جانب سے صحت سے متعلق یہ اہم انکشاف سامنے آنے کے بعد سوشل میڈیا پر ان کے دوستوں، ساتھی فنکاروں اور چاہنے والوں کی طرف سے نیک خواہشات کا تانتا بندھ گیا ہے شوبز انڈسٹری کی معروف شخصیات مایا خان، درفشاں سلیم، ثناء فہد اور رابعہ کلثوم سمیت متعدد اداکاروں نے میرب علی کی پوسٹ پر کمنٹس کرتے ہوئے ان کی جلد اور مکمل صحت یابی کے لیے دعائیں کی ہیں۔سوشل میڈیا صارفین اور مداحوں نے اداکارہ کو مشورہ دیا ہے کہ وہ اسمارٹ فون کے زیادہ استعمال سے سخت گریز کریں تاکہ اپریٹڈ انگلی پر کسی قسم کا دباؤ نہ پڑے اور زخم جلد بھر سکے۔

کچھ صارفین کا کہنا تھا کہ اس نوعیت کی طبی شکایت عام طور پر کھیلوں کی سرگرمیوں یا ہاتھوں اور انگلیوں کے مسلسل اور یکساں استعمال کے باعث بھی پیدا ہو سکتی ہے۔ اس وقت سوشل میڈیا پر میرب علی کی جلد مکمل صحت یابی کے لیے نیک تمناؤں کا سلسلہ جاری ہے۔