ملک میں مجموعی مہنگائی کی شرح 11.7 فیصد تک پہنچ گئی، آٹا، گندم اور دودھ مزید مہنگے

اسلام آباد: پاکستان میں مہنگائی کی لہر میں ایک بار پھر تیزی آگئی ہے، جہاں مئی 2026 کے دوران ماہانہ بنیادوں پر ملک میں مجموعی مہنگائی کی شرح 11.7 فیصد کی سطح تک پہنچ گئی ہے.

ادارہ شماریات (PBS) کی جانب سے جاری کردہ تازہ ترین رپورٹ کے مطابق، مئی 2025 کے مقابلے میں اس بار مہنگائی کی رفتار میں نمایاں اضافہ ریکارڈ کیا گیا ہے. رپورٹ میں بتایا گیا ہے کہ مئی کے مہینے میں شہری علاقوں میں مہنگائی کی شرح 11.8 فیصد جبکہ دیہی علاقوں میں یہ شرح 11.5 فیصد تک بڑھ گئی ہے. مجموعی طور پر، گزشتہ ماہ کے مقابلے میں مہنگائی میں 0.5 فیصد کا اضافہ دیکھا گیا ہے.ادارہ شماریات کی رپورٹ کے مطابق مختلف اشاریوں (Indexes) کی صورتحال درج ذیل رہی:

شہری و دیہی ماہانہ اضافہ: مئی میں شہری علاقوں میں ماہانہ مہنگائی 0.7 فیصد بڑھی، جبکہ دیہی علاقوں میں ماہانہ مہنگائی میں 0.3 فیصد اضافہ ریکارڈ کیا گیا.

حساس قیمتوں کا اشاریہ (SPI): سالانہ بنیاد پر ایس پی آئی 12 فیصد بڑھ گیا ہے، جبکہ مئی 2026 میں اس میں ماہانہ بنیاد پر 0.7 فیصد اضافہ ہوا.

ہول سیل پرائس انڈیکس (WPI): تھوک مہنگائی کا انڈیکس سالانہ بنیاد پر 12.7 فیصد بڑھ گیا، تاہم مئی کے مہینے میں تھوک مہنگائی کی ماہانہ شرح میں 0.8 فیصد کی معمولی کمی بھی دیکھی گئی ہے.عوام کے لیے سب سے زیادہ پریشان کن امر بنیادی غذائی اجناس کی قیمتوں میں ہونے والا اضافہ ہے. ادارہ شماریات کے مطابق صرف ایک ماہ کے دوران درج ذیل اشیاء مہنگی ہوئیں:

گندم اور آٹا: ایک ماہ کے دوران گندم کی قیمت میں 7.78 فیصد جبکہ آٹے کی قیمت میں 11.21 فیصد کا بڑا اضافہ ریکارڈ کیا گیا ہے.

ڈیری اور گوشت: ایک ماہ میں گوشت 2.25 فیصد، تازہ دودھ 1.41 فیصد اور مکھن 1.11 فیصد مہنگا ہوا.

سبزیاں اور دیگر اشیاء: آلو کی قیمت میں 4.01 فیصد اور آئس کریم کی قیمت میں 5.49 فیصد اضافہ ہوا.

اس کے علاوہ چاول، بیکری آئٹمز، ملک پاؤڈر، کوکنگ آئل، خشک میوہ جات اور تازہ پھل خریدنے کے لیے بھی شہریوں کو اب زائد پیسے خرچ کرنا پڑ رہے ہیں.