وزراء صرف الزام تراشی کر سکتے ہیں، کچھ ثابت نہیں کر سکے: مولانا عبدالغفور حیدری کی پارلیمنٹ ہاؤس میں میڈیا سے گفتگو

جمعیت علماء اسلام (ف) کے مرکزی سیکرٹری جنرل مولانا عبدالغفور حیدری نے پارلیمنٹ میں میڈیا سے گفتگو کرتے ہوئے کہا ہے کہ وزراء ایوان میں صرف الزام تراشی کر رہے ہیں لیکن کچھ بھی ثابت کرنے میں ناکام رہے ہیں۔ مولانا فضل الرحمان پر لگائے جانے والے الزامات سے متعلق سوال کے جواب میں انہوں نے کہا کہ یہ باتیں 1997ء سے چلی آ رہی ہیں، حکومت کے پاس تمام ریکارڈ موجود ہے تو وہ کرپشن ثابت کر کے دکھائے، محض پروپیگنڈے سے کوئی فرق نہیں پڑے گا۔ انہوں نے ملک میں امن و امان کی خراب صورتحال اور بڑھتے ہوئے قرضوں پر تشویش کا اظہار کرتے ہوئے خان آف قلات کے مبینہ اغوا کی شدید مذمت کی اور ریاست سے فوری رہائی کا مطالبہ کیا۔ سینیٹ میں ہونے والی تلخ کلامی پر گفتگو کرتے ہوئے ان کا کہنا تھا کہ جے یو آئی کو کسی سے حب الوطنی کا سرٹیفکیٹ لینے کی ضرورت نہیں اور وفاقی وزیر داخلہ محسن نقوی کو تنقید کا نشانہ بناتے ہوئے کہا کہ سیاسی اختلافات میں ریاستی اداروں اور حکمرانوں کو اپنا احتساب بھی کرنا چاہیے۔