پاکستان سٹاک مارکیٹ میں کاروبار کے آغاز پر تیزی

کراچی: پاکستان سٹاک ایکسچینج (پی ایس ایکس) میں زبردست تیزی کا تسلسل جاری ہے، جہاں کاروباری ہفتے کے آخری روز مارکیٹ نے ایک اور تاریخی سنگِ میل عبور کرتے ہوئے 1 لاکھ 72 ہزار پوائنٹس کی نفسیاتی حد کو پار کر لیا ہے۔

تفصیلات کے مطابق جمعہ کے روز کاروبار کے آغاز سے ہی پاکستان سٹاک مارکیٹ میں سرمایہ کاروں کا بھرپور اعتماد دیکھنے میں آیا اور مارکیٹ مثبت رجحان کے ساتھ کھلی۔ ابتدائی اوقات میں ہی ہنڈرڈ انڈیکس میں 600 سے زائد پوائنٹس کا شاندار اضافہ ریکارڈ کیا گیا، جس کے نتیجے میں انڈیکس 1 لاکھ 72 ہزار 344 پوائنٹس کی بلند ترین سطح پر پہنچ گیا۔ واضح رہے کہ گزشتہ کاروباری دن کے اختتام پر مارکیٹ میں معمولی مندی دیکھی گئی تھی اور ہنڈرڈ انڈیکس 1 لاکھ 71 ہزار 725 پوائنٹس کی سطح پر بند ہوا تھا، تاہم آج کاروباری ہفتے کے آخری دن مارکیٹ نے دوبارہ جاندار واپسی کرتے ہوئے نیا ریکارڈ قائم کر دیا ہے۔