پاکستان ترقی پذیر ممالک کے جی 24 گروپ کا چیئرمین بن گیا، وزیراعظم کا اظہارِ مسرت

پاکستان نے عالمی مالیاتی نظام میں ترقی پذیر ممالک کی موثر نمائندگی کے لیے قائم بین الحکومتی گروپ آف ٹوئنٹی فور (G-24) کی سربراہی سنبھال لی ہے، جس کے بعد وفاقی وزیرِ خزانہ محمد اورنگزیب گروپ کے نئے چیئرمین بن گئے ہیں۔ اس موقع پر وزیرِ خزانہ نے عزم ظاہر کیا کہ پاکستان آئی ایم ایف اور عالمی بینک کے ساتھ مل کر ترقی پذیر ممالک کو سستی مالی معاونت، قرضوں کے پائیدار حل اور موسمیاتی تبدیلیوں کے اثرات سے نمٹنے کے لیے فنڈز کی فراہمی کے لیے آواز اٹھائے گا۔ وزیراعظم شہباز شریف نے پاکستان کو جی 24 کی چیئرمین شپ ملنے پر مبارکباد دیتے ہوئے کہا ہے کہ یہ کامیابی عالمی اقتصادی فورمز اور پالیسی سازی کے اداروں میں پاکستان کے بااثر کردار اور آواز کو مزید تقویت دے گی۔