کراچی پورٹ پر کھاد اور گندم سے لدے 2 بحری جہازوں کی آمد

کراچی پورٹ پر 1 لاکھ 1 ہزار ٹن درآمدی کارگو سے لدے دو بحری جہاز پہنچ گئے ہیں جنہیں ترجیحی بنیادوں پر برتھ فراہم کی گئی۔ ترجمان کے پی ٹی کے مطابق کارگو میں 50 ہزار ٹن ڈی اے پی (DAP) کھاد اور 51 ہزار ٹن گندم شامل ہے، جس کی ہینڈلنگ کا عمل تیزی سے جاری ہے۔ وفاقی وزیر برائے بحری امور جنید انوار چوہدری نے کہا کہ دونوں جہازوں کی بیک وقت ہینڈلنگ کے پی ٹی کی اعلیٰ آپریشنل صلاحیت کا مظہر ہے، جبکہ ضروری اشیا کی بروقت ترسیل ملکی غذائی تحفظ کے لیے ناگزیر ہے۔ چیئرمین کے پی ٹی ریئر ایڈمرل شاہد احمد نے بھی واضح کیا کہ کراچی پورٹ ملکی سپلائی چین میں بنیادی کردار ادا کر رہا ہے اور بندرگاہ کے بنیادی ڈھانچے کو جدید بنانے کی کوششیں جاری ہیں۔