گلگت بلتستان میں آج یومِ آزادی جوش و جذبے سے منایا جا رہا ہے

گلگت بلتستان میں یکم نومبر کو یومِ آزادی روایتی قومی جوش و جذبے کے ساتھ منایا جا رہا ہے۔ یکم نومبر 1947 کو گلگت اسکاؤٹس اور مقامی جانبازوں نے جنگِ آزادی میں شجاعت کے جوہر دکھاتے ہوئے ڈوگرا راج کا خاتمہ کیا اور خطے میں پاکستانی پرچم لہرایا، جبکہ ایک سال بعد 14 اگست 1948 کو بلتستان کو بھی بھارتی تسلط سے مکمل آزاد کرا لیا گیا۔ اس تاریخی دن کی مناسبت سے پاک فوج کے شعبہ تعلقات عامہ (ISPR) نے خصوصی ملی نغمہ ’’شانِ پاکستان، گلگت بلتستان‘‘ ریلیز کر دیا ہے، جسے نامور شاعر ذیشان مہدی کے کلام اور گلوکار جے جے علی شینا کی آواز میں پیش کیا گیا ہے۔ یہ ملی نغمہ گلگت بلتستان کے غیور عوام کی پاکستان سے گہری وابستگی اور تاریخی جدوجہد کی بھرپور عکاسی کرتا ہے۔