کانگو میں ایبولا وائرس تیزی سے پھیلنے لگا، ہلاکتوں کی تعداد 131 ہوگئی

وسطی افریقی ملک جمہوریہ کانگو میں ایبولا وائرس انتہائی تیزی سے پھیلنے لگا ہے، جس کے نتیجے میں ہلاکتوں کی مجموعی تعداد بڑھ کر 131 تک پہنچ گئی ہے۔ غیر ملکی میڈیا رپورٹس کے مطابق، ملک میں وائرس کی نئی لہر کے باعث گزشتہ چند دنوں کے دوران مزید 26 ہلاکتیں رپورٹ ہوئی ہیں، جس نے مقامی حکومت اور طبی اداروں کے لیے خطرے کی گھنٹی بجا دی ہے۔

مستقبل میں اس مہلک وائرس کے پھیلاؤ کے شدید خطرات اور ہلاکتوں میں مسلسل اضافے کے پیشِ نظر عالمی ادارہ صحت (WHO) نے ہنگامی اقدام اٹھاتے ہوئے صورتحال پر ‘عالمی ہیلتھ ایمرجنسی’ نافذ کر دی ہے۔ میڈیا رپورٹس میں بتایا گیا ہے کہ کانگو کے متاثرہ علاقوں میں بنیادی طبی سہولیات انتہائی محدود ہیں، جس کے باعث مریضوں میں وائرس کی بروقت شناخت اور ان کی آئسولیشن (تنہائی) میں شدید مشکلات کا سامنا کرنا پڑ رہا ہے اور یہی وجہ اس کے تیزی سے پھیلنے کا سبب بن رہی ہے۔

دوسری جانب، اس خطرناک وبائی صورتحال کے پیشِ نظر دیگر ممالک نے بھی حفاظتی اقدامات شروع کر دیے ہیں۔ مشرقِ وسطیٰ کے ملک اردن نے فوری طور پر جمہوریہ کانگو اور پڑوسی ملک یوگنڈا سے آنے والے مسافروں کے اپنے ملک میں داخلے پر مکمل پابندی عائد کر دی ہے۔ اردن کی سرکاری خبر رساں ایجنسی کے مطابق، اس سخت سفری پابندی کا بنیادی مقصد اردن اور اس کے گردونواح کے خطے کو اس ہلاکت خیز وبا سے محفوظ رکھنا ہے