پاکستان سٹاک ایکسچینج میں زبردست تیزی

کراچی: پاکستان سٹاک ایکسچینج (PSX) میں کاروباری ہفتے کے دوسرے روز زبردست تیزی کا رجحان دیکھا جا رہا ہے اور ٹریڈنگ کا آغاز انتہائی مثبت زون میں ہوا ہے۔ کاروبار کے ابتدائی سیشن میں ہی ہنڈرڈ انڈیکس 2 ہزار 248 پوائنٹس کے نمایاں اضافے کے ساتھ 1 لاکھ 64 ہزار سے زائد کی سطح پر ٹریڈ کر رہا ہے۔ یاد رہے کہ گزشتہ کاروباری روز مارکیٹ شدید مندی کا شکار رہی تھی اور انڈیکس 3791 پوائنٹس کی بڑی کمی کے ساتھ 1 لاکھ 61 ہزار 805 پوائنٹس کی سطح پر بند ہوا تھا، تاہم آج سرمایہ کاروں کے اعتماد کی بحالی سے مارکیٹ نے اپنے نقصانات کا ازالہ کرنا شروع کر دیا ہے۔دوسری جانب، بین الاقوامی محاذ پر ایشیائی سٹاک مارکیٹس میں آج کاروبار کے دوران ملا جلا رجحان دیکھنے میں آیا ہے۔ خبر رساں ادارے کے مطابق جہاں کچھ مارکیٹس مندی کی زد میں رہیں، وہیں کچھ میں معمولی تیزی دیکھی گئی۔ جنوبی کوریا کے کوسپی (KOSPI) انڈیکس میں 3.45 فیصد، انڈونیشیا کے جکارتہ کمپوزٹ انڈیکس میں 1.85 فیصد اور جاپان کے نکی (Nikkei 225) انڈیکس میں 0.79 فیصد کی گراوٹ ریکارڈ کی گئی۔ اس کے برعکس، ہانگ کانگ کے ہینگ سینگ انڈیکس میں 0.40 فیصد اضافہ ہوا، جبکہ تھائی لینڈ کے سیٹ (SET) انڈیکس اور چین کے شنگھائی کمپوزٹ انڈیکس میں بھی معمولی تیزی کا رجحان دیکھا گیا۔