وزیراعظم کی جناح میڈیکل کمپلیکس کو 23 مارچ 2027 تک فعال کرنے کی ہدایت

وزیراعظم شہباز شریف نے اسلام آباد میں زیرِ تعمیر بین الاقوامی معیار کے جناح میڈیکل کمپلیکس کی پیش رفت پر اطمینان کا اظہار کرتے ہوئے تمام اہداف مقررہ مدت میں مکمل کرنے کی ہدایت کی ہے۔ جائزہ اجلاس کی صدارت کرتے ہوئے انہوں نے کہا کہ یہ کمپلیکس بالخصوص خیبرپختونخوا، آزاد کشمیر اور گلگت بلتستان کے مریضوں کے لیے عالمی معیار کی علاج معالجے اور جدید تشخیصی سہولیات کی فراہمی یقینی بنائے گا۔ وزیراعظم نے ہسپتال کے لیے تمام تقرریاں میرٹ پر کرنے اور انتظامی امور کے لیے مستند نجی ادارے کی خدمات حاصل کرنے کی ہدایت کی۔ اجلاس کو بریفنگ میں بتایا گیا کہ 403 بستروں پر مشتمل اس ہسپتال کا 59 فیصد تعمیراتی کام مکمل ہو چکا ہے اور اسے 23 مارچ 2027ء تک فعال کر دیا جائے گا۔