26 نومبر احتجاج کیسز: انسدادِ دہشت گردی عدالت نے اسد قیصر اور لطیف کھوسہ سمیت 4 پی ٹی آئی رہنماؤں کی عبوری ضمانتیں منظور کر لیں

اسلام آباد کی انسدادِ دہشت گردی عدالت نے 26 نومبر کے احتجاج اور سپریم کورٹ کیسز کے سلسلہ میں پی ٹی آئی رہنماؤں اسد قیصر، عاطف خان، لطیف کھوسہ اور فیصل امین گنڈاپور کی درخواستِ ضمانت قبل از گرفتاری منظور کر لی ہے۔ اے ٹی سی جج ابوالحسنات ذوالقرنین نے ملزمان کو 5، 5 ہزار روپے کے مچلکے جمع کرانے کی ہدایت کرتے ہوئے ضمانتیں 11 فروری تک کے لیے منظور کیں۔ سماعت کے دوران اسد قیصر کی 9، فیصل امین گنڈاپور کی 6، عاطف خان کی 4 اور لطیف کھوسہ کی 3 مقدمات میں ضمانتیں منظور کی گئیں۔ واضح رہے کہ چند روز قبل عدم حاضری پر ان رہنماؤں کی ضمانتیں خارج کر دی گئی تھیں، جس کے بعد ان کی جانب سے دوبارہ قبل از گرفتاری کی درخواستیں دائر کی گئی تھیں۔