تربوز دل کی صحت کے لیے مفید ، سائنسدانوں کی تحقیق میں اہم انکشاف

نئی سائنسی تحقیق میں یہ بات سامنے آئی ہے کہ تربوز کا استعمال دل اور خون کی شریانوں کی صحت کو بہتر بنانے میں مددگار ثابت ہو سکتا ہے۔

جرنل نیچر میں شائع ہونے والی رپورٹس کے مطابق تربوز میں موجود قدرتی اجزا اور اینٹی آکسیڈنٹس دل کی شریانوں اور جسم کے میٹابولک نظام کے لیے فائدہ مند ہیں۔

تحقیقات میں یہ بھی پایا گیا ہے کہ تربوز میں موجود مرکبات جسم میں نائٹرک آکسائیڈ کی پیداوار بڑھانے میں مدد دیتے ہیں، جس سے خون کی شریانیں بہتر طریقے سے پھیلتی ہیں اور خون کی گردش بہتر ہوتی ہے۔

ایک کلینیکل ٹرائل میں 18 صحت مند افراد کو دو ہفتوں تک روزانہ تربوز کا جوس استعمال کرایا گیا، جس کے بعد ان کی قلبی صحت میں بہتری کے آثار دیکھے گئے۔

ماہرین کے مطابق تربوز میں لائیکوپین نامی طاقتور اینٹی آکسیڈنٹ بھی موجود ہوتا ہے جو تکسیدی تناؤ کو کم کر کے دل کی صحت کو فائدہ پہنچاتا ہے۔

تحقیق میں کہا گیا ہے کہ اگرچہ نتائج حوصلہ افزا ہیں، تاہم ان فوائد کی مکمل تصدیق کے لیے مزید مطالعات کی ضرورت ہے۔