پاکستان روس سے تیل اور گیس کی درآمد پر غور کر رہا ہے: فیصل نیاز ترمذی

روس میں پاکستان کے سفیر فیصل نیاز ترمذی نے انکشاف کیا ہے کہ آبنائے ہرمز میں جاری کشیدگی اور بحران کے پیشِ نظر پاکستان اپنی توانائی کی ضروریات پوری کرنے کے لیے روس سے تیل کی درآمدات میں اضافے پر سنجیدگی سے غور کر رہا ہے۔ روسی خبر رساں ادارے کو دیے گئے انٹرویو میں انہوں نے واضح کیا کہ پاکستان اپنی ضرورت کا محض 10 فیصد ایندھن خود پیدا کرتا ہے اور بقیہ انحصار خلیجی ممالک پر ہے، اسی لیے آبنائے ہرمز کی بندش یا وہاں جاری بحران پاکستان کی معیشت اور توانائی کی سلامتی کے لیے سنگین خطرہ بن چکا ہے۔ سفیر کے مطابق، اسلام آباد اب متبادل ذرائع کے طور پر روس اور ترکمانستان سے جنوبی ایشیا تک پائپ لائن منصوبوں اور سڑکوں و ریلوے کے ذریعے پورے یوریشین خطے کو جوڑنے کے وژن پر توجہ مرکوز کر رہا ہے۔

فیصل نیاز ترمذی نے ایران سے متعلق جاری خفیہ مذاکرات کے حوالے سے بتایا کہ آبنائے ہرمز کی بحالی اب بات چیت کا سب سے اہم اور مرکزی نکتہ بن چکی ہے، جو کہ ابتدا میں ایجنڈے کا حصہ نہیں تھا۔ انہوں نے خبردار کیا کہ دنیا کی 22 فیصد تیل اور ایل این جی کی ترسیل اسی راستے سے ہوتی ہے، جبکہ خلیجی ممالک میں مقیم کروڑوں تارکینِ وطن کی ترسیلاتِ زر پر کئی ایشیائی ممالک کی معیشتوں کا انحصار ہے۔ پاکستانی سفیر نے اس امید کا اظہار کیا کہ عالمی سفارتی کوششوں کے ذریعے اس بحران کا پُرامن حل نکال لیا جائے گا تاکہ عالمی معیشت اور انسانی روابط متاثر نہ ہوں۔