کاروباری برادری کی مشاورت سے پائیدار تجارتی پالیسیاں تشکیل دیں گے: وزیر تجارت

وفاقی وزیر تجارت جام کمال خان سے گیٹرون انڈسٹریز، نوواٹیکس کے سی ای او تیمور داؤد اور دیگر صنعتی نمائندوں نے ملاقات کی، جس میں ٹیرف اصلاحات، پیٹروکیمیکل اور ایس ایم ای سیکٹر کو درپیش مسائل پر تفصیلی تبادلہ خیال کیا گیا۔ ملاقات کے دوران صنعتکاروں نے ڈیوٹی میں اچانک کمی کے خدشات کا اظہار کرتے ہوئے حقیقی برآمدی صنعت کے تحفظ کا مطالبہ کیا۔ جام کمال خان نے کہا کہ پاکستان کے معاشی اور توانائی کے حالات خطے کے دیگر ممالک سے مختلف ہیں، اس لیے ہمیں طویل المدتی پالیسیوں اور انفراسٹرکچر پر توجہ دینا ہوگی۔ انہوں نے رجسٹرڈ صنعتوں کے تحفظ اور غیر دستاویزی معیشت کے سدِ باب کے لیے مؤثر نظام کی ضرورت پر بھی زور دیا۔