کورکمانڈر کے سامنے تجاوزات کی نشاندہی پر انتقامی کارروائیاں شروع ہوگئیں، مولانا کے بیٹے کا ردعمل

جمعیت علمائے اسلام (ف) کے سربراہ مولانا فضل الرحمان کے صاحبزادے مولانا اسجد محمود نے اسلام آباد میں واقع ان کی رہائش گاہ پر تجاوزات کے حوالے سے کیپٹل ڈیولپمنٹ اتھارٹی (سی ڈی اے) کے نوٹس پر سخت ردعمل کا اظہار کرتے ہوئے الزام عائد کیا ہے کہ پشاور میں کور کمانڈر کے سامنے تجاوزات کی نشاندہی کرنے پر ان کے خلاف انتقامی کارروائیاں شروع کی گئی ہیں۔

سی ڈی اے کے نوٹس پر ردعمل دیتے ہوئے مولانا اسجد محمود نے کہا کہ جب پشاور میں کور کمانڈر کے سامنے تجاوزات کی نشاندہی کی گئی اور اس کا کوئی معقول جواب نہ مل سکا تو مخالفین اوچھے ہتھکنڈوں پر اتر آئے۔ انہوں نے وضاحت کی کہ سی ڈی اے کی جانب سے سیکیورٹی گارڈ کا کیبن ہٹانے، جنریٹر منتقل کرنے اور اضافی کچن کی تعمیر جیسے امور پر اعتراضات اٹھائے گئے ہیں۔ انہوں نے کڑے الفاظ میں کہا کہ ملک کے تمام ادارے مبینہ طور پر ایک شخص کے انتقامی جذبات کی تسکین کے لیے استعمال کیے جا رہے ہیں، اور سیاسی اختلافات کو ذاتی انتقام میں تبدیل کرنا انتہائی تشویش ناک ہے۔ انہوں نے جے یو آئی کے کارکنان کو مخاطب کرتے ہوئے ہدایت کی کہ وہ حالات سے پوری طرح باخبر اور بیدار رہیں۔

واضح رہے کہ اس سے قبل سی ڈی اے نے اسلام آباد میں مولانا فضل الرحمان کی رہائش گاہ پر غیر قانونی تعمیرات اور تجاوزات کی نشاندہی کرتے ہوئے نوٹس چسپاں کیا تھا، جس میں ہدایت کی گئی تھی کہ 15 روز کی مہلت کے اندر اندر تجاوزات خود ختم نہ کی گئیں تو عمارت کو سیل کرنے یا غیر قانونی تعمیرات مسمار کرنے کے خلاف سخت قانونی کارروائی عمل میں لائی جائے گی۔ سی ڈی اے نے یہ نوٹس عمارت کے رجسٹرڈ مالک امان اللہ محمد یونس کے نام پر جاری کیا ہے، اور یاد دلایا ہے کہ اس سے قبل 18 مارچ 2019 کو بھی اس رہائش گاہ سے تجاوزات ہٹانے کا باضابطہ حکم دیا گیا تھا۔