اسکردو؛ میاں بیوی، دو بچوں کا لرزہ خیز قتل، نامعلوم افراد نے پورے اہل خانہ کو ذبح کردیا

گلگت بلتستان کے ضلع اسکردو کی مدینہ کالونی میں نامعلوم افراد نے گھر میں گھس کر اندوہناک کارروائی کرتے ہوئے میاں بیوی اور ان کے دو معصوم بچوں کو چھریوں کے پے درپے وار کر کے بے دردی سے موت کے گھاٹ اتار دیا ہے۔ اس لرزہ خیز واردات کے بعد پورے علاقے میں شدید خوف و ہراس پھیل گیا ہے۔

پولیس ذرائع کے مطابق، اسکردو کی مدینہ کالونی کے عقب میں واقع ایک گھر سے چار افراد کی لاشیں برآمد ہوئیں جنہیں رات کے وقت تیز دھار آلے (چھریوں) کے وار سے قتل کیا گیا۔ پولیس کا بتانا ہے کہ مقتول شوہر کا تعلق اسکردو کے علاقے ‘تلو بروق’ جبکہ مقتولہ کا تعلق ‘پارہ چنار’ سے تھا، جنہوں نے چند برس قبل کورٹ میرج کی تھی اور ان کے دو کمسن بچے بھی تھے۔ ظالم قاتلوں نے پانچ سالہ بیٹی اور ڈھائی سالہ بیٹے کو بھی بخشا اور انہیں بھی چھریوں کے وار سے نشانہ بنایا۔

واقعے کی اطلاع ملتے ہی پولیس فوری طور پر موقع پر پہنچ گئی، جائے وقوعہ سے تمام ضروری شواہد اکٹھے کیے اور تحقیقات کا آغاز کر دیا۔ مقتولین کے لواحقین کا کہنا ہے کہ ان کی کسی کے ساتھ کوئی ذاتی دشمنی نہیں تھی، تاہم انہیں شدید شبہ ہے کہ اس قتل کی واردات میں لڑکی کے اہل خانہ ملوث ہو سکتے ہیں۔ پولیس نے نامعلوم ملزمان کی فوری گرفتاری اور فرار کو روکنے کے لیے اسکردو کے تمام داخلی اور خارجی راستوں پر سخت ناکہ بندی کر دی ہے۔