جنگ کے باعث ایرانی کرنسی میں ریکارڈ کمی، ایک ڈالر میں 18 لاکھ ریال

مشرقِ وسطیٰ میں جاری کشیدگی اور جنگی حالات نے ایرانی معیشت کو شدید بحران سے دوچار کر دیا ہے، جس کے نتیجے میں ایرانی ریال امریکی ڈالر کے مقابلے میں 18 لاکھ کی ریکارڈ کم ترین سطح پر گر گیا ہے۔ ماہرین کا کہنا ہے کہ امریکہ اور اسرائیل کے ساتھ حالیہ لڑائی، بندرگاہوں کی ناکہ بندی اور تیل کی برآمدات میں رکاوٹ نے غیر ملکی زرِ مبادلہ کے ذخائر پر دباؤ بڑھا دیا ہے۔ ناکہ بندی کے باعث تہران کے لیے سٹیل اور پیٹروکیمیکل مصنوعات کی برآمدات بھی معطل ہو چکی ہیں، جو کہ زرِ مبادلہ کا اہم ذریعہ تھیں۔ ایران کے مرکزی بینک کے مطابق سالانہ مہنگائی کی شرح پہلے ہی 65.8 فیصد تک پہنچ چکی ہے، اور کرنسی کی اس حالیہ گراوٹ سے خوراک اور ادویات سمیت تمام درآمدی اشیا مزید مہنگی ہونے کا خدشہ ہے، جس سے عوامی بے چینی میں مزید اضافہ ہو سکتا ہے۔