عالمی منڈی میں خام تیل کی قیمتوں میں بڑا اضافہ؛ پاکستان میں پٹرول مہنگا ہونے اور برآمدات متاثر ہونے کا خدشہ

ایران اور امریکا کے درمیان جنگ بندی کے عمل میں جمود کے باعث عالمی منڈی میں خام تیل کی قیمتیں ایک بار پھر بلندیوں کو چھونے لگی ہیں۔ برطانوی برینٹ کروڈ 1.38 فیصد اضافے کے ساتھ 109 ڈالر 72 سینٹس، جبکہ ڈبلیو ٹی آئی (WTI) 1.49 فیصد اضافے کے بعد 97 ڈالر 81 سینٹس فی بیرل تک پہنچ گیا ہے۔ ماہرینِ معیشت نے خبردار کیا ہے کہ عالمی قیمتوں میں اس تیزی کے باعث پاکستان میں پٹرولیم مصنوعات کی قیمتوں میں بڑے اضافے کا خدشہ ہے۔ دوسری جانب، اسٹیٹ بینک آف پاکستان نے جنگی حالات اور مہنگائی کے پیشِ نظر شرح سود میں مزید 100 بیسز پوائنٹس کا اضافہ کر دیا ہے، جس سے شرح سود 11.5 فیصد ہو گئی ہے۔ فیڈریشن چیمبر آف کامرس نے اس اضافے پر تشویش کا اظہار کرتے ہوئے کہا ہے کہ اس سے ملکی برآمدات عالمی منڈی میں غیر مسابقتی ہو جائیں گی، تاہم چیمبر کو امید ہے کہ ایران امریکا جنگ بندی کے بعد تیل کی قیمتوں میں جلد کمی واقع ہوگی۔