آبنائے ہرمز میں عدم استحکام کی وجہ امریکی و اسرائیلی جارحیت ہے: عراقچی

ایرانی وزیرِ خارجہ عباس عراقچی نے خلیجِ فارس اور آبنائے ہرمز میں بڑھتی ہوئی کشیدگی اور عدم استحکام کا ذمہ دار امریکہ اور اسرائیل کو قرار دے دیا ہے۔ جنوبی کوریا کے خصوصی ایلچی کے ساتھ ملاقات کے دوران انہوں نے خطے کی صورتحال پر تبادلہ خیال کرتے ہوئے ایران کے خلاف جاری مبینہ امریکی و اسرائیلی جارحیت اور جرائم سے آگاہ کیا۔

عباس عراقچی نے عالمی برادری پر زور دیا کہ وہ امریکی اور اسرائیلی حملوں کی واضح الفاظ میں مذمت کریں۔ انہوں نے دوٹوک موقف اختیار کرتے ہوئے کہا کہ ایران بین الاقوامی قوانین کے فریم ورک کے اندر رہتے ہوئے اپنی سلامتی، خود مختاری اور قومی مفادات کے دفاع کے لیے ضروری اقدامات کر رہا ہے۔ ایرانی وزیرِ خارجہ نے مزید واضح کیا کہ خطے میں کسی بھی قسم کی کشیدگی اور ان اقدامات کے ممکنہ نتائج کی تمام تر ذمہ داری جارح قوتوں پر عائد ہوتی ہے۔