اٹک ریفائنری کا مرکزی یونٹ بند: سپلائی لائن متاثر، ملک میں پیٹرولیم مصنوعات کے بڑے بحران کا خدشہ

خام تیل کی ترسیل میں حائل رکاوٹوں کے باعث ملک کے اہم تزویراتی (Strategic) اثاثے اٹک ریفائنری لمیٹڈ (ARL) کو تاریخ کے بدترین بحران کا سامنا ہے، جس کے نتیجے میں ریفائنری کا مرکزی یونٹ بند کر دیا گیا ہے۔ ریفائنری انتظامیہ کے مطابق گزشتہ چار روز سے راولپنڈی اور اٹک میں آئل ٹریفک پر عائد پابندیوں نے خام تیل کی سپلائی لائن کو مفلوج کر دیا ہے، جس سے نہ صرف پیداواری عمل رک گیا ہے بلکہ ملک میں ایندھن کا بڑا بحران پیدا ہونے کا خدشہ ہے۔

انتظامیہ نے خبردار کیا ہے کہ اگر یہ پابندیاں فوری طور پر ختم نہ کی گئیں تو پوری ریفائنری مکمل طور پر بند ہو جائے گی، جس کے اثرات عام عوام، مسلح افواج اور ایوی ایشن سیکٹر پر براہِ راست مرتب ہوں گے۔