ایران کے ساتھ جھوٹے وعدے کیے گئے، روسی وزیر خارجہ سرگئی لاروف

روس کے وزیر خارجہ سرگئی لاروف نے کہا ہے کہ ایران کے ساتھ سنجیدہ اور حقیقت پر مبنی مذاکرات کے بجائے اسے جھوٹے وعدوں اور دباؤ کے ذریعے ٹرخایا گیا۔

اپنے بیان میں سرگئی لاروف نے کہا کہ ایران کے معاملے میں حقائق کو نظر انداز کیا گیا اور مذاکراتی عمل میں دیانتداری کے بجائے دھمکیوں کا راستہ اختیار کیا گیا۔

انہوں نے کہا کہ روس پاکستان میں ایران اور امریکا کے درمیان ممکنہ بات چیت کی پیشرفت پر مسلسل نظر رکھے ہوئے ہے اور خطے کی بدلتی صورتحال کو قریب سے دیکھا جا رہا ہے۔

روسی وزیر خارجہ کے مطابق اگر ایران اور امریکا دو ہزار پندرہ جیسا کوئی قابل قبول معاہدہ کرنے میں کامیاب ہو جاتے ہیں تو یہ نہ صرف خطے بلکہ عالمی سطح پر ایک بڑی پیشرفت ثابت ہو سکتی ہے۔

سرگئی لاروف نے مزید کہا کہ موجودہ صورتحال انتہائی غیر یقینی ہے اور حالات چند گھنٹوں میں کئی بار تبدیل ہو سکتے ہیں، اس لیے کسی بھی نتیجے پر پہنچنے سے پہلے محتاط رہنا ضروری ہے۔