لاہور ہائیکورٹ: اغوا کے مقدمے میں کم عمر ملزم کی درخواست ضمانت منظور

لاہور ہائیکورٹ نے لڑکی کے اغوا میں معاونت کے الزام میں گرفتار فرسٹ ایئر کے طالب علم محمد نوید کی ضمانت منظور کرتے ہوئے ایک اہم تحریری فیصلہ جاری کیا ہے، جس میں ملزم کی کم عمری کو رعایت کی بنیاد بنایا گیا ہے۔ جسٹس طارق سلیم شیخ نے 16 صفحات پر مشتمل فیصلے میں واضح کیا کہ نادرا کے برتھ سرٹیفکیٹ کے مطابق ملزم کی عمر 16 سال سے کم ہے، اس لیے اس کا کیس جووینائل جسٹس سسٹم ایکٹ کے دائرہ اختیار میں آتا ہے۔ عدالت نے ملزم کو دو لاکھ روپے کے مچلکوں کے عوض رہا کرنے کا حکم دیتے ہوئے مشاہدہ کیا کہ کم سن ملزمان کا معاملہ بالغوں سے مختلف ہوتا ہے اور قانون کا مقصد سزا کے بجائے ان کی ذہنی بحالی اور انہیں جرائم کی دنیا سے دور رکھنا ہے۔

ملزم محمد نوید، جس کے خلاف ملتان پولیس نے 2025 میں 12 سالہ بچی کے اغوا میں معاونت کا مقدمہ درج کیا تھا، نے اپنے دفاع میں موقف اختیار کیا کہ وہ بے گناہ ہے اور اس نے صرف انسانی ہمدردی کے تحت مدد کی تھی۔ ملزم کے مطابق رات کی تاریکی میں مذکورہ لڑکی نے اس کے گھر کا دروازہ کھٹکھٹایا اور بتایا کہ اسے نامعلوم افراد وہاں چھوڑ گئے ہیں، جس پر ملزم نے اسے اپنی نانی کے پاس پناہ دی اور اگلی صبح لڑکی کے بتائے ہوئے رشتہ دار رانا الطاف کو اطلاع دی جو ایک خاتون کے ہمراہ آکر اسے لے گیا۔ عدالت نے ملزم کے بیان اور قانونی تقاضوں کو مدنظر رکھتے ہوئے طالب علم کی ضمانت منظور کر لی ہے۔