وزیراعظم شہباز شریف کا ایرانی صدر سے رابطہ، خطے کی صورتحال پر اہم گفتگو

اسلام آباد: وزیر اعظم محمد شہباز شریف نے اسلامی جمہوریہ ایران کے صدر ڈاکٹر مسعود پزشکیان سے ٹیلیفونک رابطہ کیا، جس میں دونوں رہنماؤں کے درمیان تقریباً پینتالیس منٹ تک تفصیلی گفتگو ہوئی۔

ذرائع کے مطابق گفتگو کے دوران خطے کی مجموعی صورتحال پر تفصیلی تبادلہ خیال کیا گیا اور امن و استحکام کے لیے جاری سفارتی کوششوں پر بھی غور کیا گیا۔

وزیراعظم نے ایرانی صدر اور قیادت کا شکریہ ادا کیا کہ انہوں نے گیارہ اور بارہ اپریل دو ہزار چھبیس کو اسلام آباد میں مذاکرات کے لیے اعلیٰ سطحی وفد بھیجا۔ ایرانی وفد کی قیادت اسپیکر محمد باقر قالیباف اور وزیر خارجہ عباس عراقچی نے کی۔

وزیراعظم نے صدر پزشکیان کو سعودی عرب، قطر اور ترکیہ سمیت مختلف عالمی رہنماؤں کے ساتھ اپنی حالیہ ملاقاتوں سے بھی آگاہ کیا اور کہا کہ یہ روابط خطے میں پائیدار امن کے لیے اتفاق رائے پیدا کرنے میں مددگار ثابت ہو رہے ہیں۔

انہوں نے اس ہفتے فیلڈ مارشل سید عاصم منیر کے دورہ تہران کے دوران ہونے والی تعمیری بات چیت کو بھی سراہا اور اس پر ایرانی قیادت کا شکریہ ادا کیا۔

وزیراعظم کا کہنا تھا کہ پاکستان دوست ممالک کے تعاون سے خطے میں امن اور استحکام کے فروغ کے لیے اپنی سنجیدہ کوششیں جاری رکھے گا۔ انہوں نے ایرانی سپریم لیڈر آیت اللہ مجتبیٰ خامنہ ای کے لیے نیک تمناؤں کا بھی اظہار کیا۔

اس موقع پر ایرانی صدر مسعود پزشکیان نے پاکستان کے امن کے لیے اقدامات کو سراہتے ہوئے کہا کہ دونوں ممالک کے تعلقات مزید مضبوط ہوں گے۔