فیصل کپاڈیا، مومنہ مستحسن اور بھارتی کامیڈین کی نیویارک میں ملاقات

نیویارک کے ایک معروف ریسٹورنٹ میں سرحد پار کے فنکاروں کی کہکشاں اس وقت سجی جب پاکستانی موسیقی کے آئیکن فیصل کپاڈیہ اور گلوکارہ مومنہ مستحسن کی ملاقات بھارتی کامیڈین ذاکر خان سے ہوئی۔ سابقہ میوزیکل بینڈ ‘سٹرنگز’ کے بانی رکن فیصل کپاڈیہ نے انسٹاگرام پر اس خوبصورت محفل کی تصاویر شیئر کرتے ہوئے اسے “اچھے دوستوں کے ساتھ سیلفی ٹائم” قرار دیا اور نیویارک کے احباب کی زبردست مہمان نوازی کا شکریہ ادا کیا۔ یہ یادگار ملاقات نیویارک کے مشہور ریسٹورنٹ ‘کڈیلم’ میں ہوئی، جہاں فنکاروں نے کیرالا کے روایتی جنوبی بھارتی کھانوں سے لطف اٹھایا۔ اس موقع پر ان کے ہمراہ نیرجا پٹیل اور جمی رضوی بھی موجود تھے۔

بھارتی کامیڈین ذاکر خان نے بھی اس پوسٹ پر محبت بھرے تبصروں کے ساتھ اپنا ردِعمل ظاہر کیا۔ دلچسپ بات یہ ہے کہ یہ ملاقات ذاکر خان کے نیویارک میں ہونے والے آخری شو کے موقع پر ہوئی، جس کے بعد انہوں نے ایک طویل بریک پر جانے کا اعلان کیا ہے۔ ذاکر خان نے سوشل میڈیا پر اپنے جذبات کا اظہار کرتے ہوئے بتایا کہ نیویارک نے انہیں بے پناہ محبت اور ناقابلِ فراموش لمحات دیے ہیں، اور اب وہ شاید 2029 یا 2030 میں دوبارہ مداحوں سے ملاقات کریں گے۔ فنکاروں کی اس بے تکلف ملاقات کو سوشل میڈیا پر مداحوں کی جانب سے بے حد سراہا جا رہا ہے، جو اسے پاک-بھارت ثقافتی روابط کی ایک خوبصورت مثال قرار دے رہے ہیں۔