کرشنا ابھیشیک اور سنیتا آہوجا کے درمیان برسوں پرانی رنجش آخر کار ختم ہوگئی

ممبئی: بھارتی کامیڈی انڈسٹری کے مقبول ستارے کرشنا ابھیشیک اور ان کے ماموں گووندا کی اہلیہ سنیتا آہوجا کے درمیان برسوں سے جاری تلخی آخر کار ختم ہو گئی ہے۔ دونوں شخصیات کے درمیان صلح ایک ٹی وی شو کے سیٹ پر ہوئی، جہاں طویل عرصے بعد انہیں ایک دوسرے کے ساتھ خوش گوار موڈ میں دیکھا گیا۔ سوشل میڈیا پر وائرل ہونے والی ویڈیو میں 42 سالہ کرشنا، ان کی اہلیہ کشمیرا شاہ اور سنیتا آہوجا کو ایک دوسرے کو جذباتی انداز میں گلے لگاتے اور ہنسی مذاق کرتے دیکھا جا سکتا ہے۔

سنیتا آہوجا نے اس موقع پر میڈیا سے گفتگو کرتے ہوئے تصدیق کی کہ 14 سال بعد ان کے خاندان کی یہ رنجش ختم ہوئی ہے۔ انہوں نے بڑے دل کا مظاہرہ کرتے ہوئے کہا کہ “ہم اپنے بچوں سے کب تک ناراض رہ سکتے ہیں؟ جب سب اپنی اپنی زندگی میں خوش ہیں تو دل میں میل رکھنے کا کوئی فائدہ نہیں۔” سنیتا کا مزید کہنا تھا کہ اب وہ کسی سے ناراض نہیں رہنا چاہتیں بلکہ سب کو دعائیں دینا چاہتی ہیں۔