مشرقِ وسطیٰ میں جنگ کے باوجود معاشی خوشخبری؛ مارچ میں پاکستان کا کرنٹ اکاؤنٹ 1.07 ارب ڈالر سرپلس رہا

کراچی: مشرقِ وسطیٰ میں جاری شدید جنگی حالات اور عالمی معاشی دباؤ کے باوجود پاکستان کے لیے معاشی محاذ سے بڑی کامیابی سامنے آئی ہے۔ اسٹیٹ بینک آف پاکستان کی جانب سے جاری کردہ تازہ ترین اعداد و شمار کے مطابق، مارچ 2026ء میں ملک کا کرنٹ اکاؤنٹ 1 ارب 7 کروڑ ڈالر سرپلس رہا ہے۔ مرکزی بینک کے مطابق، گزشتہ سال اسی عرصے (مارچ 2025ء) میں کرنٹ اکاؤنٹ 1.2 ارب ڈالر سرپلس ریکارڈ کیا گیا تھا۔

معاشی تجزیہ کاروں کے مطابق، رواں مالی سال کے پہلے 8 ماہ کے دوران مجموعی طور پر کرنٹ اکاؤنٹ کی صورتحال مستحکم رہی ہے اور اس عرصے میں مجموعی طور پر 80 لاکھ ڈالر کا سرپلس ریکارڈ کیا گیا ہے۔ اگرچہ گزشتہ مالی سال 25ء کے ابتدائی 8 ماہ میں یہ سرپلس 1.7 ارب ڈالر تھا، تاہم موجودہ علاقائی تناؤ اور سپلائی چین کے چیلنجز کے تناظر میں کرنٹ اکاؤنٹ کا مثبت رہنا ملکی معیشت کے لیے ایک مضبوط دفاع ثابت ہو رہا ہے۔اسٹیٹ بینک کے ذرائع کا کہنا ہے کہ برآمدات میں بہتری اور ترسیلاتِ زر میں استحکام نے کرنٹ اکاؤنٹ کو سرپلس رکھنے میں کلیدی کردار ادا کیا ہے۔ ماہرین کا ماننا ہے کہ اگر کرنٹ اکاؤنٹ کا یہ مثبت رجحان برقرار رہتا ہے، تو اس سے زرمبادلہ کے ذخائر پر دباؤ کم ہوگا اور روپے کی قدر کو استحکام ملے گا، جو کہ مشرقِ وسطیٰ کی کشیدگی کے باعث پیدا ہونے والے عالمی معاشی خطرات کے مقابلے میں پاکستان کے لیے ایک اہم ڈھال ہے