ایران کی امریکا کے ساتھ مذاکرات سے پہلے اہم مطالبات تسلیم کرانے کی کوشش

ایران نے امریکہ کے ساتھ باضابطہ مذاکرات کے آغاز سے قبل اپنے تزویراتی مطالبات پر مشتمل ایک نیا 10 نکاتی ڈرافٹ پیش کر دیا ہے، جس میں واضح کیا گیا ہے کہ ان بنیادی اصولوں کی منظوری کے بغیر وہ کسی سنجیدہ گفت و شنید کا حصہ نہیں بنے گا۔ الجزیرہ ٹی وی کے مطابق، تہران کے ان مطالبات میں معاشی پابندیوں کا خاتمہ، یورینیم کی افزودگی پر مشروط سمجھوتہ اور آبنائے ہرمز سے محفوظ گزرگاہ کے لیے مخصوص پروٹوکولز شامل ہیں۔ ایران نے مطالبہ کیا ہے کہ اس اہم گزرگاہ سے حاصل ہونے والا ٹیکس ملک کی تعمیرِ نو اور جنگی نقصانات کے ازالے کے لیے وقف کیا جائے۔ ایرانی موقف کے مطابق، وہ محض عارضی جنگ بندی کے بجائے خطے میں جنگ کا مستقل خاتمہ چاہتا ہے، جس کا اطلاق حزب اللہ اور حوثی باغیوں سمیت تمام علاقائی اتحادیوں پر ہوگا۔ تہران نے دوٹوک الفاظ میں واضح کیا ہے کہ وہ ان نکات پر کسی قسم کی لچک دکھانے کو تیار نہیں اور مذاکرات کا مستقبل امریکہ کی جانب سے ان ابتدائی مطالبات کی تسلیم پر منحصر ہے۔