چینی حکومت چاہتی ہے کہ امریکی صدر الیکشن ہار جائیں، ٹرمپ کا الزام

امریکی صدر ڈونلڈ ٹرمپ نے چین پر انتخابی عمل میں مداخلت کا سنگین الزام عائد کرتے ہوئے کہا ہے کہ چینی حکومت ہرگز نہیں چاہتی کہ وہ دوبارہ اقتدار میں آئیں اور وہ ان کی انتخابی شکست کی خواہشمند ہے۔ قوم سے اپنے ایک اہم خطاب میں صدر ٹرمپ نے انکشاف کیا کہ چین امریکی الیکشن ڈیٹا کو ہیک کرنے کی مسلسل کوششیں کر رہا ہے۔ اس خطرے سے نمٹنے کے لیے انہوں نے ڈائریکٹر آف نیشنل انٹیلی جنس اور وفاقی تحقیقاتی ادارے (FBI) کو فوری طور پر چین سے متعلق ان ہیکنگ سرگرمیوں کی باقاعدہ تحقیقات شروع کرنے کا حکم دے دیا ہے۔

صدر ٹرمپ نے اپنے خطاب میں واضح کیا کہ انہوں نے ملکی اداروں کو انتخابات سے متعلق تمام خفیہ انٹیلی جنس دستاویزات کو فوری طور پر ڈی کلاسیفائی (عوامی سطح پر ظاہر) کرنے کی ہدایت جاری کر دی ہے۔ ان کا کہنا تھا کہ چین نے اس سے قبل سال 2020ء کے امریکی صدارتی انتخابات کے ڈیٹا میں بھی مداخلت کی تھی، اور آج امریکا کے انتخابی نظام کو بیرونی ممالک سے کئی طرح کے سنگین خطرات کا سامنا ہے۔

قومی سلامتی اور فوجی طاقت کا ذکر کرتے ہوئے صدر ٹرمپ نے فخر سے کہا کہ امریکا کے پاس اس وقت دنیا کی سب سے بہترین اور طاقتور ترین فوج موجود ہے۔ انہوں نے اپنی انتظامیہ کی کارکردگی کو سراہتے ہوئے کہا کہ ماضی میں امریکی سرحدیں بدترین حالت میں تھیں لیکن ان کی حکومت نے سرحدوں کو مکمل طور پر محفوظ بنا کر اب بہترین حالت میں لا کھڑا کیا ہے۔ انہوں نے خارجہ پالیسی کا تذکرہ کرتے ہوئے مزید کہا کہ ان کی انتظامیہ نے وینزویلا کے محاذ پر بھی اہم کامیابی حاصل کی ہے۔