وزیراعظم کا پیٹرول کی قیمت فوری طور پر 80 روپے کم کر کے 378 روپے فی لیٹر کرنے کا اعلان

وزیراعظم نے قوم سے خطاب میں عوامی ریلیف کیلئے بڑے پیکج کا اعلان کرتے ہوئے پٹرولیم لیوی میں فی الفور 80 روپے فی لیٹر کمی کا اعلان کردیا۔

وزیراعظم کے مطابق آج رات 12 بجے سے پٹرول کی قیمت 458 روپے سے کم ہو کر 378 روپے فی لیٹر ہو جائے گی اور اس فیصلے کا اطلاق ایک ماہ کیلئے پورے ملک میں ہوگا۔

انہوں نے کہا کہ موٹر سائیکل سواروں کو فی لیٹر 100 روپے سبسڈی دی جائے گی جبکہ گڈز ٹرانسپورٹ، پبلک ٹرانسپورٹ اور مال بردار گاڑیوں کو بھی ایک ماہ تک اسی شرح سے سبسڈی فراہم کی جائے گی۔

وزیراعظم نے مزید بتایا کہ چھوٹے ٹرکوں کو 70 ہزار روپے، بڑے ٹرکوں کو 80 ہزار روپے اور پبلک ٹرانسپورٹ بسوں کو ایک لاکھ روپے ماہانہ سبسڈی دی جائے گی تاکہ کرایوں میں اضافہ نہ ہو اور اشیائے ضروریہ کی قیمتیں قابو میں رہیں۔

انہوں نے کہا کہ چھوٹے کسانوں کیلئے 1500 روپے فی ایکڑ امداد فراہم کی جائے گی جبکہ پاکستان ریلویز کی اکانومی کلاس کے کرایوں میں اضافہ نہ کرنے کی ہدایات جاری کردی گئی ہیں۔

وزیراعظم کا کہنا تھا کہ خلیجی خطے میں جاری کشیدگی کے باعث عالمی سطح پر تیل کی قیمتوں میں غیر معمولی اضافہ ہوا ہے، جس کے اثرات پاکستان پر بھی پڑے ہیں، تاہم حکومت نے گزشتہ تین ہفتوں میں 129 ارب روپے خرچ کرکے عوام کو اس بوجھ سے بچایا۔

انہوں نے کہا کہ حکومت عوام کو مہنگائی کے طوفان سے بچانے کیلئے تمام وسائل بروئے کار لا رہی ہے اور قومی یکجہتی کے ذریعے اس چیلنج کا مقابلہ کیا جائے گا۔