پیٹرولیم سیکٹر میں ڈیجیٹلائزیشن پر تنازع: “مخصوص موبائل ڈیوائسز” کی خریداری لازمی قرار دینے کے خلاف اوگرا کو خط؛

کراچی/اسلام آباد: آئل مارکیٹنگ ایسوسی ایشن آف پاکستان نے آئل اینڈ گیس ریگولیٹری اتھارٹی (اوگرا) کو لکھے گئے خط میں پیٹرولیم سیکٹر کو ڈیجیٹل کرنے کے حکومتی اقدامات کی مکمل حمایت کا اعادہ کیا ہے، تاہم مخصوص موبائل ڈیوائسز کی لازمی خریداری کی شرط پر تحفظات کا اظہار کیا ہے۔ ایسوسی ایشن کا موقف ہے کہ تقریباً تمام ریٹیل آؤٹ لیٹس پہلے ہی جدید اسمارٹ فونز سے لیس ہیں، لہٰذا نئی اور مہنگی ڈیوائسز کی خریداری غیر ضروری ہے۔

ایسوسی ایشن نے خط میں واضح کیا کہ آئل مارکیٹنگ کمپنیاں اس وقت کم مارجنز اور بڑھتے ہوئے کاروباری اخراجات کے باعث پہلے ہی شدید دباؤ کا شکار ہیں۔ کسی مخصوص برانڈ یا ڈیوائس کی شرط کمپنیوں پر بھاری مالی بوجھ ڈالے گی۔ مطالبہ کیا گیا ہے کہ اوگرا اپنے تقاضوں کو کسی خاص برانڈ کے بجائے صرف “اینڈرائیڈ” سسٹم تک محدود رکھے تاکہ کمپنیاں اپنے موجودہ اسمارٹ فونز کے ذریعے ڈیجیٹلائزیشن کا ہدف پورا کر سکیں اور آزادانہ طور پر ڈیوائسز کی دستیابی یقینی بنائیں۔