امریکا میں گھوڑے نے گینیز ورلڈ ریکارڈ قائم کر دیا

شمالی کیرولائنا: امریکہ میں ایک 19 سالہ گھوڑے ‘گرنگو’ نے اپنی ذہانت اور فرتی کا مظاہرہ کرتے ہوئے گینیز ورلڈ ریکارڈ اپنے نام کر لیا ہے۔ اس باصلاحیت گھوڑے نے صرف 2 منٹ اور 47 سیکنڈ کے مختصر دورانیے میں 38 مختلف کرتب دکھائے، جو کہ اس نوعیت کا ایک نیا عالمی ریکارڈ ہے۔

گرنگو کی مالکن اور ٹرینر لارین زیپیڈا نے اسے برسوں کی محنت سے تربیت دی ہے۔ ریکارڈ سازی کے دوران گرنگو نے نہ صرف روایتی کرتب دکھائے بلکہ جھنڈا لہرانے، گھنٹی بجانے، ناچنے اور گیند کو لات مارنے جیسے مشکل کام بھی پلک جھپکتے مکمل کیے۔ سب سے حیران کن منظر وہ تھا جب گرنگو نے اپنی ناک کے ذریعے کی بورڈ چلا کر سب کو دنگ کر دیا۔

لارین زیپیڈا کا کہنا ہے کہ گرنگو کی یہ کامیابی اس بات کا ثبوت ہے کہ صحیح تربیت اور لگن سے جانوروں سے بھی ناممکن کام لیے جا سکتے ہیں۔ انہیں امید ہے کہ یہ ریکارڈ گھوڑوں کے دیگر ٹرینرز کے لیے بھی حوصلہ افزائی کا باعث بنے گا۔