علاقائی ممالک کی جانب سے امن کی کوششیں خوش آئند ہیں: ایرانی وزارت خارجہ

تہران: ایرانی وزارتِ خارجہ کے ترجمان اسماعیل بقائی نے مشرقِ وسطیٰ کی حالیہ صورتحال اور سفارتی کوششوں پر بریفنگ دیتے ہوئے واضح کیا ہے کہ ایران خطے میں امن کے لیے کی جانے والی علاقائی کوششوں کو قدر کی نگاہ سے دیکھتا ہے۔ انہوں نے اسلام آباد میں ہونے والے پاکستان، سعودی عرب، ترکیہ اور مصر کے وزرائے خارجہ کے چار ملکی اجلاس کے تناظر میں کہا کہ دوست ممالک کی ثالثی خوش آئند ہے، تاہم واقعات کو حقیقت پسندانہ نظر سے دیکھنا ضروری ہے۔

ترجمان نے انکشاف کیا کہ ایران اور امریکہ کے درمیان تاحال کوئی براہِ راست بات چیت نہیں ہوئی، البتہ ثالثوں کے ذریعے دونوں ممالک کے درمیان پیغامات کا تبادلہ جاری ہے۔ اسماعیل بقائی نے سخت موقف اپناتے ہوئے کہا کہ ایران کو اب تک دی گئی زیادہ تر سفارتی تجاویز “غیر حقیقی، غیر معقول اور حد سے متجاوز” ہیں، جنہیں موجودہ حالات میں تسلیم کرنا ممکن نہیں۔

واضح رہے کہ یہ بیان ایک ایسے وقت میں سامنے آیا ہے جب پاکستان نے مشرقِ وسطیٰ میں امن کے لیے ‘امن اقدام’ (Peace Initiative) شروع کر رکھا ہے اور نائب وزیراعظم اسحاق ڈار اس حوالے سے چینی قیادت کو اعتماد میں لینے کے لیے بیجنگ روانہ ہو رہے ہیں۔ ایران کا یہ ردِعمل ظاہر کرتا ہے کہ وہ مذاکرات کے لیے تیار ہے لیکن اپنی خود مختاری اور مفادات پر کسی قسم کا سمجھوتہ کرنے کے حق میں نہیں ہے۔