حج 2026 عازمین کے لیے بڑی خبر: پاک حج ایپ پر میڈیکل فارم بھرنا لازمی قرار

وزارتِ مذہبی امور نے حج 2026 کے عازمین کے لیے ‘پاک حج موبائل ایپ’ پر میڈیکل فارم بھرنا لازمی قرار دے دیا ہے۔ ترجمان وزارتِ مذہبی امور کے مطابق، تمام عازمین کو ہدایت کی گئی ہے کہ وہ ایپ پر موجود طبی سوالنامہ رواں ہفتے جمعہ تک لازمی طور پر مکمل کر لیں۔ اس سوالنامے کا مقصد عازمینِ حج کو دورانِ سفر اور قیامِ حج کے دوران مربوط اور بروقت طبی سہولیات کی فراہمی میں معاونت کرنا ہے۔

طبی سوالنامے میں عازمین سے مختلف امراض بشمول بلڈ پریشر، امراضِ قلب، شوگر، دمہ، گنٹھیا اور تھائی رائیڈ کے بارے میں دریافت کیا گیا ہے، جس کا جواب ‘ہاں’ یا ‘ناں’ میں دینا ہوگا۔ اس ڈیٹا کی مدد سے حج مشن کو عازمین کی صحت کی صورتحال کا پہلے سے علم ہوگا اور ہنگامی حالت میں بہتر طبی امداد دی جا سکے گی۔

مزید برآں، پاک حج ایپ کو اپ ڈیٹ کرتے ہوئے اس میں حج ویزہ پرنٹ کرنے کا لنک اور حج پروازوں کا مکمل شیڈول بھی شامل کر دیا گیا ہے۔ ترجمان کا کہنا ہے کہ ایپ پر مرحلہ وار نئی معلومات اور فیچرز شامل کیے جا رہے ہیں، اس لیے عازمینِ حج تازہ ترین اعلانات اور اپنی پروازوں کی معلومات کے لیے باقاعدگی سے پاک حج موبائل ایپ چیک کرتے رہیں۔