سعودی عرب اور قطر کا پاکستان کی جانب سے عید پر آپریشن روکنے کا خیرمقدم

ریاض/دوحہ: سعودی عرب اور قطر نے عید الفطر کے مقدس موقع پر پاکستان کی جانب سے افغانستان میں دہشت گردوں کے خلاف جاری آپریشن ‘غضب للحق’ کو عارضی طور پر روکنے کے فیصلے کا بھرپور خیر مقدم کیا ہے۔

سعودی وزارتِ خارجہ نے اپنے بیان میں عارضی جنگ بندی کو امن کی جانب ایک اہم پیش رفت قرار دیتے ہوئے کہا کہ سعودی عرب، قطر اور ترکیہ کی اپیلوں پر جنگ بندی کا فیصلہ خوش آئند ہے۔ سعودی حکام کا مزید کہنا تھا کہ مذاکرات ہی کسی بھی تنازع کے حل کا بہترین اور پائیدار راستہ ہیں۔

قطر کی جانب سے بھی اس اقدام کو سراہا گیا ہے۔ قطری وزارتِ خارجہ کے مطابق، یہ فیصلہ دونوں ممالک کے درمیان ماحول کو بہتر بنانے کی جانب ایک مثبت قدم ہے، جو مستقبل میں مستقل امن معاہدے کی راہ ہموار کر سکتا ہے۔

واضح رہے کہ گزشتہ روز وفاقی وزیر اطلاعات عطاء تارڑ نے اعلان کیا تھا کہ عید الفطر کے احترام میں آپریشن ‘غضب للحق’ کو عارضی طور پر روک دیا گیا ہے، جو 23 اور 24 مارچ کی درمیانی رات تک معطل رہے گا۔ تاہم، حکومت نے یہ بھی واضح کیا ہے کہ اگر افغانستان کی جانب سے کسی قسم کی دراندازی کی کوشش کی گئی تو آپریشن مزید شدت کے ساتھ دوبارہ شروع کر دیا جائے گا۔