ایران کے کویت، بحرین اور اردن میں امریکی فوجی تنصیبات پر حملے، کئی اہلکار زخمی

امریکا کی جانب سے مسلسل ساتویں رات ایران پر حملوں کے جواب میں تہران نے جوابی کارروائی کرتے ہوئے کویت، بحرین اور اردن میں امریکی فوجی تنصیبات کو نشانہ بنایا ہے۔ ایرانی فوج اور سپاہِ پاسدارانِ انقلاب نے شمالی بحرِ ہند میں امریکی بحری جہاز، بحرین میں امریکی ڈرون ڈپو اور مصنوعی ذہانت کے مرکز کو بیلسٹک میزائلوں اور ڈرون حملوں سے تباہ کرنے کا دعویٰ کیا ہے۔ کویت میں ایرانی میزائلوں اور ڈرونز نے فوجی کیمپوں کے ساتھ ساتھ ایک بجلی گھر اور ڈی سیلینیشن پلانٹ کو بھی نشانہ بنایا، جس سے تنصیبات کو نقصان پہنچا اور متعدد اہلکار زخمی ہوئے۔ دوسری جانب اردنی فوج نے اپنی فضائی حدود میں داخل ہونے والے ایران کے 10 میزائلوں کو فضا میں ہی ناکارہ بنانے کا دعویٰ کیا ہے، جبکہ بحرین میں ہنگامی صورتحال کے باعث بار بار فضائی حملے کے سائرن بج رہے ہیں اور شہریوں کو پناہ گاہوں میں منتقل ہونے کی ہدایات جاری کی گئی ہیں۔ ایران نے خبردار کیا ہے کہ اگر امریکی حملے جاری رہے تو یہ جوابی کارروائیاں مزید شدت اختیار کریں گی۔