ایران کے جنگ بندی قبول کرنے سے امریکا کو بحری ناکہ بندی مضبوط بنانے کا موقع ملا، محسن رضائی

ایران کی اسلامی انقلابی گارڈ کور (IRGC) کے کمانڈر محسن رضائی نے انکشاف کیا ہے کہ ایران کی جانب سے دو ہفتوں کی جنگ بندی قبول کرنے کا فائدہ اٹھاتے ہوئے امریکا نے مذاکرات کے دوران اپنی بحری ناکہ بندی کو مزید مضبوط کیا۔ میڈیا سے گفتگو کرتے ہوئے انہوں نے اعلان کیا کہ امریکا کی مسلسل خلاف ورزیوں کے باعث دونوں ممالک کے درمیان طے پانے والی مفاہمتی یادداشت اب عملی طور پر ختم ہو چکی ہے۔ محسن رضائی نے واشنگٹن کی صریح خلاف ورزیوں کی تفصیل بتاتے ہوئے کہا کہ جنوبی لبنان سے اسرائیلی افواج کا انخلا نہ ہونا، آبنائے ہرمز میں متبادل بحری راستہ قائم کرنا، ایرانی سرزمین پر حملے اور ایران کے منجمد اثاثے بحال نہ کرنا اس کے واضح ثبوت ہیں۔ انہوں نے مزید کہا کہ اسلام آباد مذاکرات کے بعد امریکا نے “بیک وقت جنگ اور مذاکرات” کی پالیسی اپنائی تاکہ ایران کو پیچھے ہٹنے پر مجبور کیا جا سکے۔ کمانڈر نے متنبہ کیا کہ اگر امریکی حملے جاری رہے تو ایران دفاعی کے بجائے جارحانہ حکمتِ عملی اختیار کرتے ہوئے جنگ کا رخ بدل دے گا۔